Mjeti më i përhapur për transport në Sri Lankë quhet ”tuk-tuk“, dhe shërben për bartjen e njerëzve dhe mallrave. Pikërisht ky mjet, në shumë vende të Lindjes së Largët shërben si një lloj taksie, pasi banorët e përdorin për të kryer punët e zakonshme ditore, shkruan Anadolu Agency (AA).
Megjithatë ”tuk-tuku“ në Sri Lankë shërben edhe për qëllime turistike, më saktësisht për bartjen e njerëzve të cilët kanë ardhur nga larg, për të shijuar bukuritë e këtij vendi.
Dimensionet e vogla që ka, i japin “tuk-tuk-ut”, avantazh ndaj mjeteve tjetra të transportit sepse e bëjnë të lëviz shumë më lehtë në zonat e mbipopulluara.
Sri Lanka njihet botërisht për pyjet tropikale, fushat e çajit, orizit dhe kauçukut, megjithatë çaji mbetet burimi kryesor i të ardhurave.
Bëhet fjalë për një shtet në të cilin jetojnë mbi 22 milionë banorë të besimeve dhe kulturave të ndryshme.
Qytetet antike në këtë vend, janë nën mbrojtje të UNESCO-s, ndërsa pallatet dhe ndërtesat tjera paraqesin një dëshmi të traditës shumëvjeçare.
Rreth 74 për qind e popullsisë së Sri Lankës flasin gjuhën singale, 18 për qind gjuhën tamile dhe tetë për qind gjuhë të tjera.