Një zyrtare e OKB-së që po heton vrasjen e gazetarit saudit Jamal Khashoggi u takua sot me një këshilltar të partisë qeverisëse turke për Drejtësi dhe Zhvillim (AK) në Ankara, raporton Anadolu Agency (AA).
Agnes Callamard, raportuesja e posaçme e OKB-së për ekzekutimet jashtëgjyqësore, përmbledhëse ose arbitrare, mbajti një takim prej një ore e gjysëm me Yasin Aktay lidhur me vrasjen e Khashoggit vjeshtën e kaluar në Konsullatën Saudite në Stamboll.
Callamard dhe delegacioni shoqërues përfunduan takimet e tyre në Stamboll të enjten dhe udhëtuan për në Ankara për t’u takuar me zyrtarët e qeverisë dhe përfaqësuesit e inteligjencës.
Zyrtarja e OKB-së do të qëndrojë në Turqi deri më 2 shkurt.
Zyra e OKB-së për të Drejtat e Njeriut të Komisionerit të Lartë javën e kaluar tha se hetimi ndërkombëtar do të udhëhiqej nën autorizimin e Callamard dhe do të “rishikojë dhe vlerësojë, nga perspektiva e të drejtave të njeriut, rrethanat që lidhen me vrasjen e Khashoggit”.
Callamard është duke u shoqëruar nga Baronesha Helena Kennedy dhe Profesor Duarte Nuno Vieira nga Universiteti i Koimbras në Portugali.
Delegacioni i OKB-së të mërkurën zhvilloi ekzaminime rreth Konsullatës Saudite në Stamboll, ndërsa më pas zhvilloi bisedë me Irfan Fidan, kryeprokurorin e qytetit.
Callamard do të dorëzojë gjetjet dhe rekomandimet e saj mbi hetimin e vrasjes në formë të një raporti në sesionin e Këshillit të OKB-së për të Drejtat e Njeriut të planifikuar për në qershor.
Khashoggi, një kontribues i gazetës “The Washington Post”, u vra në Konsullatën Saudite në Stamboll më 2 tetor.
Pas shpjegimeve të ndryshme kontradiktore, Rijadi pranoi se ai u vra brenda ndërtesës së konsullatës, duke thënë se vrasja ishte një operacion jashtë kompetencave dhe dijenisë së qendrës.
Turqia ka kërkuar ekstradimin e shtetasve sauditë të përfshirë në vrasje, si dhe një llogaridhënie më të plotë nga ana e Rijadit.