Kryeministri spanjoll tha se vendi i tij do të pranojë një anije me emigrantë, të bllokuar në Mesdhe, me qëllim që të evitojë një katastrofë humanitare.
Sanchez, që u ul në detyrë javën e shkuar, tha se anija do të ankorohej në Valencia. Emigrantët në bordin e “Aquarius” u shpëtuan nga disa gomone në afërsi të brigjeve të Libisë, gjatë fundjavës, në gjashtë operacione të ndryshme shpëtimi.
“Është detyra jonë të ndihmojmë në evitimin e një katastrofe humanitare dhe ti ofrojmë një port të sigurt këtyre njerëzve, në përmbushje të obligimeve tona për të drejtat e njeriut”, tha zyra e Sanchez.
Mes personave të shpëtuar, që ndodhen në anijen “Aquarius”, janë 123 minorenë të pashoqëruar, 11 fëmijë të mitur dhe shtatë gra shtatzëna. Minorenët janë të moshës nga 13 deri në 17 vjeç dhe vijnë nga Eritrea, Gana, Nigeria dhe Sudani.
Ministri i ri i brendshëm i Italisë, Mateo Salvini refuzoi të lejonte anijen të hynte në një nga portet italiane duke thënë se shpëtimi i jetëve është një detyrë por kthimi i Italisë në një kamp të madh refugjatësh, nuk është.
“Italia ka bërë më shumë nga çfarë i takon, por këtë radhë ne themi jo”, shkroi Salvini në Twitter. Pavarësisht qëndrimit të Salvinit, kryebashkiakët e Tarantos dhe Napolit u ofruan të gatshëm të prisnin emigrantët, me këtë të fundit që tha: nëse një ministër pa zemër lë gra shtatzëna, fëmijë, të moshuar, qenie njerëzore të vdesin, porti i Napolit është i gatshëm t’i presë ata.
Zoti Salvini kishte thënë se Italia nuk duhet të jetë i vetmi vend që të pranojë anijet nga Afrika e Veriut, duke nxitur Maltën që është më pranë Libisë që të lejonte anijen të ankorohej.
Por Malta, një vend ishull me gjysmë milioni banorë thotë se merr më shumë refugjatë per capita sesa Italia, një partner i BE-së. Italia ka pranuar mbi 600 mijë migrantë që kanë ardhur me barka që nga viti 2014.
Zëdhënësi i Komisionit Evropian, Margaritis Schinas kishte thënë në një konferencë për shtyp se komisioni u kishte kërkuar dy anëtarëve të Bashkimit Evropian që t’u japin migrantëve “kujdesin që u duhet”, duke e quajtur “një detyrim humanitar”.
Mes 629 migrantë në bord, janë 123 të mitur të pashoqëruar, 11 fëmijë të tjerë dhe shtatë gra shtatzëna.
Organizata bamirëse SOS Mediterranee tha se migrantët kishin ushqime të mjaftueshme për të paktën një ditë tjetër. Pas lajmeve se Spanja kishte marrë iniciativën t’i pranonte imigrantët, zëdhënësi i UNHCR-së, tha se ky është një zhvillim pozitiv dhe një shfaqje e admirueshme solidariteti nga Spanja për refugjatët.
“Kur kemi një gjendje të tillë ku, rezervat e ushqimeve po zvogëloheshin, kjo do të thoshte se ndërsa vazhdonin diskutimet se ku do të ankorohej anija, shanset e mbijetesës së këtyre njerëzve, po bëheshin gjithnjë e më të vogla. Detyrimi humanitar duhet të ketë gjithmonë përparësi. Diskutimet politike se kush ka përgjegjësi për rajone të caktuara dhe në ç’kontekst, duhet të vijnë më vonë”.
Koordinatori i Mjekëve pa Kufi, Aloys Vimard kishte përshkruar më parë kushtet e migrantëve.
“Njerëzit po flenë në kuvertë. Nuk është aspak e rehatshme. Ata janë të dobët, të lodhur, të raskapitur. Prandaj do të donim të kishin një vend për të pushuar ku të ndjeheshin të respektuar”.
