Komisioni Shtetëror Zgjedhor (KSHZ) i Maqedonisë ka bërë të ditur se në referendumin që parasheh ndryshimin e emrit dhe anëtarësimin e vendit në NATO dhe në Bashkimin Evropian (BE), jehona e votuesve deri në orën 17 është 28,83 për qind apo gjithsej 455.771 qytetarë kanë shfrytëzuar të drejtën e votës, raporton Anadolu Agency (AA).
Kryetari i KSHZ-së, Oliver Derkoski, theksoi se procesi i votimit është duke u zhvilluar në mënyrë të rregulltë, pa ndërprerje dhe pa probleme të mëdha.
Derkoski shtoi se shumica e kundërshtesave që parashtrohen vazhdojnë të jenë si më herët, ajo që disa qytetarë nuk figurojnë në listën e votuesve. Ai theksoi se kundërshtesat janë hedhur poshtë, për shkak se nuk kanë pasur dokumente valide të identifikimit.
“Nga 87,25 për qind e të dhënave të përpunuara nga qendrat e votimit, kanë votuar 455.771 votues, respektiivisht 28,83 për qind e qytetarëve të regjistruar në listën zgjedhore”, tha Derkoski.
Ai bëri të ditur se numri më i madh i daljes së qytetarëve në votim është regjistruar në komunën e Sarajit me 54,21 për qind, ndërsa komuna e Ilindenit me 14,47 për qind është komuna me numrin më të vogël të jehonës së votuesve.
Kjo është konferenca e parafundit për media nga gjithsej gjashtë të paralajmërua nga ky institucion, ku informon për procesin dhe daljen e votusve. Konferenca e fundit zyrtare është paralajmëruar për në ora 19:00.
Gjithsej 1.806.836 qytetarë të Maqedonisë me të drejtë vote do të kenë mundësi të shfrytëzojnë të drejtën e tyre deri në orën 19:00 në 3.513 vendvotime në 80 komuna të vendit. Që referendumi të kalojë i suksesshëm, pjesëmarrja e votuesve duhet të jetë mbi 50 për qind nga numri i qytetarëve të regjistruar në listën e votuesve.
Pyetja e referendumit, që është i treti me radhë në nivel shtetëror në 27 vite të pavarësisë së Maqedonisë, është “A jeni për në NATO dhe BE me pranimin e marrëveshjes midis Maqedonisë dhe Greqisë”. Ky referendum vjen pas marrëveshjes në qershor midis Maqedonisë dhe Greqisë, e cila parasheh ndryshimin e emrit të shtetit në Republika e Maqedonisë së Veriut dhe paraqet kushtin kryesor për anëtarësim të vendit në NATO dhe çeljen e negociatave me BE-në.
Referendumi është konsultativ dhe ligjërisht nuk është i detyrueshëm. Megjithatë, qeveria maqedonase deklaroi se rezultati i referendumit do të konsiderohet i detyrueshëm. Në rast të një rezultati pozitiv të referendumit, vendimi përfundimtar për marrëveshjen me Greqinë do të miratohet nga Kuvendi i Maqedonisë, ku për ndryshime kushtetuese do të nevojitet vota e dy të tretave të deputetëve.
Pas përfundimit të këtij procesi në Maqedoni, nevojitet që marrëveshja të ratifikohet nga Parlamenti grek.
