Sekretari i Përgjithshëm i NATO-, Jens Stoltenberg i ka shtrirë dorën për paqe Rusisë, duke i bërë thirrje t’i rikthehet Traktatit Bërthamor.
“NATO nuk dëshiron një Luftë të re të Ftohtë, ne nuk dëshirojmë një garë armësh dhe i bëjmë thirrje Rusisë që të zbatojë Traktatin për Armë Bërthamore. Raketat e reja ruse kanë kapacitet bërthamor, ato mund të arrijnë në qytetet europiane dhe janë të vështira për t’u pikasur, prandaj Moska duhet të veprojë në përputhje me paktin, shkruan Klan.
Gjatë vizitës në Sofje, shefi i NATO-s vlerësoi edhe rolin strategjik të Bullgarisë në Detin e Zi, duke hedhur poshtë zërat se Bullgaria është “Kali i Trojës” i Moskës në aleancën ushtarake.
Tensionet mes NATO-s dhe Rusisë janë rritur ndjeshëm pas vendimit të SHBA-ve për t’u tërhequr nga Traktati i Luftës së Ftohtë me Rusinë, për moszhvillimin e raketave me rreze të mesme. Ky hap u ndoq më pas edhe nga Kremlini, duke nxitur një garë të rrezikshme mes dy superfuqive bërthamore.
