Ministri i Drejtësisë i Republikës së Turqisë, Abdulhamit Gül deklaroi se është e qartë se terroristi nga Zelanda e Re nuk ka ardhur vetëm si turist në Turqi, raporton Anadolu Agency (AA).
“Është e qartë se vizita e autorit të sulmeve në Zelandën e Re në Turqi ishte më shumë se turistike”, tha Gül, i cili mëngjesin e sotëm ishte mysafir i panelit editorial të AA në Ankara.
Të paktën 50 persona u vranë në sulmin terrorist që ndodhi më 15 mars gjatë namazit të xhumasë në dy xhami në Christchurch.
Sulmi u krye nga 28-vjeçari australian Brenton Tarrant, i cili vizitoi Turqinë në dy raste në vitin 2016.
Shërbimet turke po hetojnë motivet e mundshme të vizitave të Tarrant dhe nuk përjashtojnë mundësinë e qëllimeve terroriste.
Një ditë pas sulmit në shenjë solidariteti me viktimat një delegacion i lartë i Turqisë vizitoi Zelandën e Re të kryesuar nga Zëvendëspresidenti turk Fuat Oktay dhe ministri i Jashtëm Mevlüt Çavuşoğlu.
Presidenti Recep Tayyip Erdoğan mbrëmë deklaroi se është e qartë se sulmi terrorist në dy xhamitë në Zelandën e Re nuk ishte akt i një individi, por një akt i organizuar terrorist.