Mijëra protestues që mbanin parulla dhe postera anti-Trump më vonë kaluan në hyrjen e lagjes Downing Street, megjithatë ata nuk arritën të afrohen për shkak të kordonit të policisë.
Hyrja në rrugën Whitehall të Londrës qendrore u mbyll nga furgonët policor, kuajt dhe barrierat metalike, ndërkohë më shumë njerëz u tubuan edhe në sheshin e Parlamentit.
Një balonë “Baby Trump” prej rreth 6 metrash qëndronte në shesh në vendin ku automjeti i Trump duhej të kalonte për të arritur në takimin me kryeministren May.
Protestat pritet të vazhdojnë gjatë gjithë ditës me më shumë njerëz të cilët vazhdojnë t’i bashkohen. Lideri i Partisë Laburiste dhe disa politikanë të tjerë po ashtu pritet t’i bashkohen protestës në sheshin e Parlamentit.
Siç është planifikuar, pasdite Trump dhe May do të adresohen në një konferencë të përbashkët për media pas takimit ku do të diskutojnë për partneritetin e ardhshëm tregtar mes Mbretërisë së Bashkuar dhe SHBA-ve.
Trump dje filloi vizitën e tij shtetërore tre-ditore në Britani. Ai u prit zyrtarisht nga Mbretëresha në Pallatin Buckingham dhe u takua me anëtarët e familjes mbretërore në një banket shtetëror në mbrëmje.
Pas takimeve të ditës së sotme, Trump po ashtu pritet të darkojë me Princin Charles.
Vizita e presidentit amerikan do të vazhdojë edhe gjatë ditës së nesërme. Ai do të marrë pjesë në ceremoninë përkujtimore në Portsmouth për të shënuar 75-vjetorin e fundit të Luftës së Dytë Botërore.
Trump pritet që nesër të largohet nga Mbretëria e Bashkuar për të vazhduar në Francë për ngjarjet e mëtejshme përkujtimore kushtuar fundit të Luftës së Dytë Botërore.
