Ministrit të Brendshëm, Fatmir Xhafaj ka reaguar për vdekjen e shoferit të tij 31-vjeçar Shkëlzen Qordja, i cili u gjet i pajetë paraditen e së shtunës në garnizonin e Gardës së Republikës.
Në një deklaratë për mediat, Xhafaj shkruan:
Jam i shokuar dhe nuk gjej fjalë të ngushëlloj prindërit dhe gjithë familjen e Shkëlzenit për humbjen tragjike të jetës së tij. Kjo ngjarje e rëndë ka shkaktuar një dhimbje të fortë njerëzore për mua dhe për të gjithë ata që punuan dhe e njohën nga afër atë.
U prefsh në paqe, i dashur Shkëlzen!
Nuk është dita sot për mua që të bëj politikë dhe as e ndaloj dot që politika të vazhdojë të merret me mua sot.
Kam humbur krejt papritur një njeri të afërt, i cili si dhe gjithë familja e tij, ishte bërë si pjesë e familjes sime.
Nuk kam asnjë koment për rrethanat e ndarjes së tij nga jeta, sepse prokurorët dhe ekspertët përkatës po punojnë ndërkohë për sqarimin e tyre.
Nëse nuk kam se si u kërkoj hienave politike të mos sulen mbi të vdekurin, u lutem mediave që kanë sadopak ndjenjë njerëzore të respektojnë dhimbjen e prindërve, vellezërve, të afermve e miqve të tij.
Ai ishte një djalë i shkëlqyer, një punonjës i papërtuar e fjalëpak, që la një boshllëk të madh pas vetes dhe nuk e meriton në asnjë mënyrë përbaltjen.
Faleminderit paraprakisht, kujtdo që do ta konsiderojë këtë apel njerëzor!
Sipas autoriteteve, Qordja dyshohet se është vetëvrarë, megjithatë hetimet për qartësuar shkaqet e ngjarjes dhe zbardhjen e rrethanave vijojnë. Shkëlzen Qordja ishte pjesë e Gardës së Republikës që prej 29 Marsit 2017./
