Kukësi ka marrë një fitore “të falur” ndaj Kamzës me rezultatin 0-2. Ekipi verilindor ka arritur të marrë maksimumin në këtë ndeshje duke koleksionuar 3 pikët e qetësisë, pasi vinte pas disa ndeshjesh pa fitore. Ekipi i Armando Cungut kishte shumë fat, pasi të dy golat u shënuan në pjesën e parë dhe ishin autogolë nga të besuarit e trajnerit Ernest Gjoka.
Ishte një nga takimet më të çuditshëm në këtë kampionat, pasi të dy herët portieri Kirev u detyrua të nxirrte topin nga rrjeta pas autogolave të ekipit të tij. Në minutën e 30′, Çyrbja fut një top drejt zonës. Et’hemi godet me kokë dhe sfera ndalet në traversë, por topi kthehet në mbrojtje. Erlis Frashëri në tentativë për ta larguar e dërgoi topin në rrjetë për 0-1.
Si të mos mjaftonte goditja e parë, pas vetëm 3 minutash Kamza ndëshkon sërish veten. Reginaldo ul një top mjaft të mirë për Çyrbjen, ky i fundit kroson drejt zonës. Teqja në tentativë për ta larguar e dërgon vetë në rrjetë për 0-2. Portreti i ngrirë i trajnerit Ernest Gjoka tregon gjithçka për gjendjen psikologjike të ekipit të Kamzës.
Një moment që duhet evidentuar është dhe një rast shumë i diskutueshëm në minutën e 28′. Plaku me topin në këmbë kërkon një krosim drejt zonës. Cuculi me duart e hapura e pengon topin brenda zonës, por për gjyqtarin Indrit Myrtja gjithçka e rregullt. Në arë moment rezultati ishte 0-0.
Pjesa e dytë nuk ndryshoi shumë në lojën e skuadrave, pasi Kukësi u mbrojt mirë, ndërsa Kamza nuk arriti të gjente golin e nderit. Shiu i rrëmbyer rëndoi tapetin e stadiumit të Kamzës. Trajneri Ernest Gjoka e nis aventurën e tij te Kamza me një humbje të pafat kundër ish-ekipit të tij, ndërsa Cungu merr një fitore qetësie. Trajneri shkodran i gëzohet pikëve të marra, pavarësisht se skuadra e tij vinte me shumë mungesa në këtë sfidë duke patur vetëm 4 lojtarë në stol duke llogaritur dhe portierin Maloku brenda.
Pas kësaj fitoreje jashtë fushe, Kukësi mbetet në vendin e pestë me 25 pikë, një më pak se Laçi e Teuta. Ekipi i Kamzës mbetet 1 pikë më shumë se Kastriotit në vendin e parafundit. Java e ardhshme e gjen Kukësin në transfertën e vështirë ndaj Luftëtarit, ndërsa ekipi i Gjokës do të luajë kundër Laçit jashtë fushe.
KATEGORIA SUPERIORE – JAVA 14
E diel, më 25 nëntor, ora 14:00
Stadiumi “Kamza”, Kamzë
KAMZA 0-2 KUKËSI
Shënues: E. Frashëri 30′ (autogol), Teqja (autogol)
KAMZA: Kirev, Frashëri, Teqja, Beqiri, Idrizaj, Zisi (Mumajesi 59′), Arrabal, Mehmeti, Plaku, Fukui (Roloviç 69′), Martinena (Rezi 82′). Trajner: Ernest Gjoka. Të gatshëm: Bonani, Krasniqi, Peçi.
KUKËSI: Frashëri, Maliki, Qaqi, Krasniqi, Cuculi, Kordeiro, Ethemi, Shkodra, Dzaria, Çyrbja, Rexhinaldo. Trajner: Armando Cungu. Të gatshëm: Maloku, Shpehar, Limaj, Kalaja.
KARTONË TË VERDHË: Mehmeti 11′, Arrabal 18′, Teqja 20′
GJYQTARË: Indrit Myrtja, Melis Dervishi, Fisnik Thorja, Klajdi Kola.
DELEGAT: Besnik Çela; VËZHGUES: Plarent Kotherja.
RASTET
SHTYLLA E SHKODRËS | 70′ – Donjet Shkodra provon nga një goditje dënimi, por shtylla i mohon gëzimin e golit të parë sezonal.
GOLI I DYTË I KUKËSIT | 32’ – Pas harkimit të Çyrbes, këtë herë është Teqja që godet me kokë dhe shënon në portën e tij.
GOLI I PARË I KUKËSIT | 30’ – Ethemi godet me kokë, pas harkimit nga e djathta, topi përplaset në shtyllë dhe më pas shkon te Frashëri, i cili e shtyn topin në portën e tij.
PRETENDIMI I KAMZËS | 28’ – Plaku harko nga e djathta, por topi devijohet nga Cuculi. Protesta të shumta nga vendasit, por gjyqtari nuk akordon 11-metërsh, edhe pse është një rast mjaft i dyshimtë.
Vuajtje, por tre pikë për Laçin. Ka vendosur në minutat shtesë Redon Xhixha, i cili shënoi me kokë golin e fitores 2-1 për bardhezinjtë. Një ndeshje e luftuar shumë, me krutanët që rrezikuan dhe mund të kishin marrë pikë. Altiparmakovski shënoi i pari, Ymeraj barazoi. Në fund fitoi Laçi.
Në pjesën e parë Laçi kishte disi më shumë kontrollin e topit, por nuk kishte rrezikshmërinë e duhur. Shtubina në një rast edhe mund të kishte shënuar, por u tregua i pasaktë. Kastrioti ishte agresiv dhe kërkoi të befasonte me kundërzbritjet e bëra. Gjithsesi nuk pati asnjë gol në 45 minutat e para.
Krutanët e nisën pjesën e dytë vrullshëm dhe në tre momente rrezikuan me brazilianin Roxher. Pavarësisht se Kastrioti rrezikoi, ishte Laçi që arriti të shënonte i pari. Dragoi me kokë nisi një top për Xhixhën, ky i fundit shërbeu në zonë për Altiparmakovskin. Sulmuesi maqedonas u tregua i saktë dhe e dërgoi topin në rrjetë.
Pesë minuta më pas ishte Emiljano Çela ai që iu afrua golit për Kastriotin. Selmani në momentin e fundit u bë shpëtimtar për skuadrën e tij. Gjithsesi nuk do të vononte goli. Shkodrani Ersil Ymeraj, pasi Roxher i uli një top, goditi fort dhe e dërgoi topin në trekëndësh. 1-1.
Laçi nuk u dorëzua deri në fund dhe falë këmbënguljes arriti të shënonte golin me vlerën e tre pikëve. Deliu nga e majta krosoi në zonë dhe Xhixha me kokë ia doli të mposhte portierin Kuka dhe të bënte që kurbinasit të festonin në fund.
KATEGORIA SUPERIORE – JAVA 14
E diel, më 25 nëntor, ora 14:00
Stadiumi i Laçit, Laç
LAÇI 2-1 KASTRIOTI
Shënues: Altiparmakovski 61′, Xhixha 92’/ Ymeraj 70′
LAÇI: Selmani, Fangaj, Mersinaj, Gjoni, Dragoj (Deliu 77′), Lushkja, Jonuzi, Najdenov (Eler 46′), Shtubina (Prengaj 69′), Xhixha, Altiparmakovski. Trajner: Migen Memelli. Të gatshëm: Hasanbelli, Bushi, Pjeshka, Smaçi.
KASTRIOTI: Kuka, Husein, Shehi (Bardhi 38′), Çela, Stijepoviç, Domgjoni, Ymeraj, Okebugu, Shehu, H. Marku, Roxher. Trajner: Stavri Nica. Të gatshëm: Puja, Atsina, Caca, T. Marku, Neziri.
KARTONË TË VERDHË: Prengaj 79′/Shehi 24, Shehu 43′
GJYQTARË: Klodian Shahini, Fatmir Lamaj, Rejdi Zajimi, Andi Koçi.
DELEGAT: Bujar Pregja; VËZHGUES: Kastriot Xhaferraj.
DIREKT
92′ – Redon Xhixha realizon me kokë për Laçin, pas një krosi të Deliut
70′ – Ymeraj provon me të majtën në hyrje të zonës së Laçit, duke shënuar golin e barazimit për Kastriotin.
61′ – Xhixha pason saktë nga e majta, duke gjetur Altiparmakovskin në qendër të zonës, i cili me mjaft qetësi devijon topin duke kaluar Laçin në avantazh.
