Autoritetet greke kanë zbardhur tabulatet telefonike të Aleksandër Lucës dhe bashkëpunëtorit të tij grek Manolis Koukouras, të akuzuar për vrasjen e studentes 21-vjeçare Eleni Topaloudi më 28 Nëntor 2018 në ishullin Rodos.
Rezulton se greku Manolis Koukouras i kishte dërguar mesazh një avokati të njohur disa orë pas krimit. Në orën 10:11 ai komunikon në telefon me avokatin dhe e pyet se çfarë duhet të bëjë.
Nga ana tjetër, 20-vjeçari shqiptar Aleksandër Luca telefononte vazhdimisht një mikun e tij. Ata kanë komunikuar mes tyre katër herë, konkretisht në oraret 08:12, 08:45, 11:07 dhe 13:12. Gjatë bisedës me njëri-tjetrin, ata flasin sikur të mos kishte ndodhur asgjë, në një kohë kur kishin kaluar vetëm disa orë nga krimi i rëndë, raporton Klan.
Hetuesit po përpiqen të zbulojnë edhe bisedat mes shqiptarit dhe 21-vjeçarit grek Manolis Koukouras në rrjetet e tyre sociale.
Dy të rinjtë akuzohen se kanë dhunuar, abuzuar dhe vrarë studenten Eleni Topaloudi. Më pas trupin e saj e hodhën në det. Luca dhe Koukouras ndodhen tashmë në burgun e Grevenas. Ata kanë pranuar se kanë marrë pjesë në krim, por të dy akuzojnë njëri-tjetrin si personin që e dhunoi studenten dhe vendosi për ta hedhur trupin në det. Ndërkohë, Aleksandër Luca është i dyshuar edhe për abuzimin seksual ndaj një vajze tjetër, rast që po hetohet.
