Përfaqësia e Fondacionit Maarif të Turqisë (TMV) në Shqipëri tha se shkollat e këtij fondacioni në Shqipëri, të njohura si “International Maarif Schools of Albania”, realizuan pa ndryshim të orarit gjithë planprogramin e vitit shkollor, një pjesë e të cilit vijoi online për disa muaj si pasojë e pandemisë së koronavirusit të ri (COVID-19).
Në një deklaratë për Anadolu Agency (AA), TMV tha se pandemia COVID-19 u shfaq si një situat befasuese dhe se fondacioni u mobilizua me shpejtësi për të hartuar planet për arsimin dhe aktivitetet online.
“Si rezultat i vëzhgimeve që i bëmë gjatë këtij procesi, ne pamë që nxënësit tanë në fillim kishin vështirësi psikologjike dhe mendonin se situata negative përreth do të ndikonte në shkollat e tyre dhe arsimi i tyre do të kishte pengesa. Megjithatë, ne si TMV, pas takimeve dhe studimeve të shpeshta me gjithë kolegët tanë, vendosëm në funksion arsimin dhe aktivitetet në internet në një kohë të shkurtër diku rreth një javë. Mbuluam të gjitha kurrikulat dhe provimet e përgatitura për arsimin formal në fillim të vitit shkollor, pa ndryshuar ditët dhe orët e mësimeve”, thuhet në deklaratë.
“Pasi bëhej fjalë për një praktikë të re, në fazën e parë ishte e vështirë për nxënësit të mësoheshin me situatën. Megjithatë, reagimet që morëm nga nxënësit dhe prindërit brenda një kohe të shkurtër, na treguan edhe një herë se sa e duhur dhe kuptimplotë ishte praktika që zhvilluam. Përveç mësimit online, aktivitetet tona si netët e talenteve online, kurset online falas të maturës dhe kurset kompensuese të hapura për të gjithë, neve na vendosën në radhë të parë. Dhe pas një kohe, ne pamë se kishim “nxënës online” të cilët nuk ishin zyrtarisht nxënës tanë, por që morën pjesë në klasat dhe aktivitetet tona në internet për shkak të cilësisë së punës sonë”, shtoi Fondacioni Maarif.
Në lidhje me procesin e regjistrimit për vitin mësimor 2020-2021 në shkollat Maarif, fondacioni tha se interesimi për vitin e ri mësimor është rritur si rezultat i mundësive të ofruara nga TMV në kohë të vështira dhe punimeve të zhvilluara nga punonjësit e saj.
“Përkundër pasigurive që burojnë nga COVID-19 këtë vit, ka një interes të konsiderueshëm dhe rritje në numrin e nxënësve në të gjitha nivelet”, tha TMV.
Fondacioni deklaroi se është afër mbushjes së kapaciteteve në nivelet K12 në Tiranë dhe se dy klasa të reja janë hapur në shkollën e mesme në Elbasan, ndërsa sukses është arritur edhe në regjistrimet në nivelin universitar.
Ndërkaq, lidhur me atë se si do të zhvillohet viti i ri shkollor nëse pandemia COVID-19 do të vazhdojë tutje, TMV theksoi se gjatë verës janë bërë plane mbi procesin arsimor mbi të gjitha rrethanat e mundshme në të cilat mund të zhvillohet arsimi dhe se shkollat Maarif në Shqipëri veprojnë në kuadër të ligjeve të vendit.
“Në këtë rast, ne jemi në pritje të vendimit të Ministrisë së Arsimit, Rinisë dhe Sportit të Shqipërisë. Kemi përfunduar planet tona për të gjitha alternativat. Kemi hartuar plane për katër alternativa: arsimin formal, arsimin online, arsimin me orar të përgjysmuar dhe arsimin me dy ndërrime. Ne do të fillojmë punimet e nevojshme për modelin arsimor që do të zbatohet pas vendimit të ministrisë”, tha Përfaqësia e Fondacionit Maarif në Shqipëri.
Fondacioni Maarif i Turqisë administron disa institucione arsimore në Shqipëri, si Universitetin New York Tirana , gjimnazet “New York High School” dhe “IMSA High School Elbasan”, shkollën 9-vjeçare “New York Basic Education” dhe kopshtin “IMSA Farm-Kindergarten”.
