SHKODER- Pas dërgimit të formularëve tek Altin Hajri në Shijak, të cilit dje iu sekuestrua edhe pasuria, operacioni Forca e Ligjit është zhvendosur në Shkodër. Paralelisht me dërgimin e shkresave zyrtare tek Lulzim Berisha në Durrës dhe Ardian Capja në Elbasan, efektivët e OFL ndodhen në Shkodër. Burime për Dosja.al bëjnë me dije se OFL ndodhet në këtë qytet që prej mëngjesit për të bërë sekuestrimin e pasurisë së një prej familjeve më të përfolura në Shkodër për lidhjen me krimin dhe drogën, por për shkak të hetimit, nuk mund të bëhet publik asnjë emër.
Më herët sot, OFL në një njoftim zyrtar dha detaje nga puna e ditës së dytë. Lul Berisha dhe Ardian Capja, janë dy subjektet që duhet të provojnë burimin e pasurisë brenda 48 orësh, dhe më pas të dhënat do t’i kalojnë SPAK. Brenda dy ditësh, ata duhet të përgjigjen me shkrim për çdo pyetje të OFL. SPAK, brenda 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre. Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
