Ka përfunduar me rrjeta të paprekura ndeshja e parë mes Laçit dhe Kukësit, e vlefshme për gjysmëfinalen e Kupës së Shqipërisë. Duket se finalistja mes dy ekipeve veriore do të vendoset në ndeshjen e kthimit, që do të luhet më 18 prill në “Zeqir Ymeri”.
Të dyja skuadrat u treguan shumë të kujdesshme për të mos pësuar gol, me lojën që u përqendrua përgjithësisht në mesfushë, ku pati dyluftime të ashpra, që e detyruan kryesorin të nxirrte disa kartonë të verdhë. Nuk munguan edhe hedhjet e mjeteve ndezëse nga tifozët vendas, që ishin të shumtë nga shkallët e stadiumit.
Gjatë pjesës së parë rastet ishte sporadike dhe pa shumë rrezikshmëri, ndërsa në fraksionin e dytë portieri i Laçit, Vata reagoi mrekullisht pas goditjes me kokë të Gurit.
Kukësi arriti ta dërgonte topin në rrjetë në minutën e 73-të, por për kryesorin Koçi kishte ndërhyrje të parregullt në sulm. Pak minuta më vonë ishte Koliçi që reagoi në pozicion, duke ruajtur të paprekur portën e Kukësit. Përtej përpjekjeve të të dyja skuadrave, kjo ndeshje përfundoi 0-0, rezultat që në pamje të parë mund të favorizojë Kukësit, por një gol i Laçit në fushën kundërshtare mund të marrë vlerë të dyfishtë. /Top Channel
