Me gjashtë ankesa të reja të refuzuara sot dhe nëntë të tjera të refuzuara dje, Gjykata Supreme ka refuzuar gjithsej 15 ankesa të parashtruara nga subjekte dhe kandidatë politikë për procesin e zgjedhjeve të parakohshme parlamentare të mbajtura më 14 shkurt në Kosovë, transmeton Anadolu Agency (AA).
Nëpërmjet një komunikate për media, gjykata ka njoftuar se sot ka refuzuar ankesat e subjekteve Lëvizja Vetëvendosje, Romani Iniciativa, Partia Liberale Egjiptiane, Partia e Ashkalive për Integrim, Lëvizja Përparimtare e Romeve të Kosovës, Ujedinjena Zajednica – Adrijana Hoxhiq dhe subjektit Social Demokratska UNIJA – SDU, duke i konsideruar ato si të pabazuara.
Lëvizja Vetëvendosje kishte kërkuar nga PZAP-ja të bëhet numërimi i 20.550 pakove me fletëvotime të arritura me postë nga votuesit jashtë Kosovë, por PZAP e kishte hedhur poshtë këtë kërkesë si “kërkese4 pas-afatit”.
Në mesin e këtyre ankesave është edhe ankesa e kandidates për deputete Adriana Hoxhiq kundrejt vendimit të Panelit Zgjedhor për Ankesa dhe Parashtresa me anë të të cilit u vendos që të anulohen 4 mijë e 205 vota për subjektin e saj politik në 10 komuna me shumicë serbe në Kosovë.
Sipas rezultateve të shpallura nga KQZ, Adrijana Hoxhiq, ka marrë 6 mijë e 422 vota, mirëpo me anulimin e 4 mijë e 205 votave, asaj do t’i mbesin vetëm 2 mijë e 217 vota.
Në vazhdim pritet që Komisioni Qendror i Zgjedhjeve të certifikojë rezultatin përfundimtar të zgjedhjeve në mënyrë që t’i hapet rrugë formimit të institucioneve të reja të vendit.