Komisioni Evropian njoftoi dje se ka miratuar një numër konkluzionesh mbi Turqinë pas ditës së parë të Samitit të Liderëve të BE-së në Bruksel, transmeton Anadolu Agency (AA).
Krerët e shteteve dhe qeverive të BE-së filluan samitin dyditor duke diskutuar migracionin dhe bënë thirrje për një strategji të re migrimi që i hap rrugën BE-së të nënshkruajë marrëveshje të ngjashme me vendet e palëve të treta si ajo e arritur me Turqinë në vitin 2016.
Edhe pse samiti i BE vazhdoi, seksioni i deklaratës së samitit mbi Turqinë u nda me opnionin pas përfundimit të bisedimeve mbi Turqinë.
Barend Leyts, zëdhënësi i Presidentit të Këshillit Evropian Charles Michel, ndau gjithsej nëntë konkluzione në lidhje me Turqinë në Twitter.
Këshilli Evropian iu kthye situatës në Mesdheun Lindor dhe marrëdhënieve të Bashkimit Evropian me Turqinë dhe kujtoi interesin strategjik të BE-së për një mjedis të qëndrueshëm dhe të sigurt në Mesdheun Lindor dhe për zhvillimin e një marrëdhënieje bashkëpunuese dhe të dobishme reciprokisht me Turqinë.
BE-ja ka përshëndetur uljen e tensioneve në Mesdheun Lindor, “që duhet të mbështetet në përputhje me deklaratën e Anëtarëve të Këshillit Evropian të 25 marsit 2021”, thekson konkluzioni i parë.
Unioni Doganor, dialogu i nivelit të lartë
“Këshilli Evropian përsëriti gatishmërinë e BE-së për t’u angazhuar me Turqinë në një mënyrë fazore, proporcionale dhe të kthyeshme për të rritur bashkëpunimin në një numër fushash me interes të përbashkët, në varësi të kushteve të përcaktuara të paraqitura në mars dhe në konkluzionet e mëparshme të Këshillit Evropian”, thuhet më tej.
“Në përputhje me këtë kornizë, (BE-ja) ndjek fillimin e punës në nivelin teknik drejt një autorizimi për modernizimin e Unionit Doganor BE-Turqi dhe kujton nevojën për të adresuar vështirësitë aktuale në zbatimin e Unionit Doganor, duke siguruar zbatimin efektiv të tij në të gjitha shtetet anëtare”, theksohet në deklaratë.
“Gjithashtu ndjek punën përgatitore për dialog të nivelit të lartë me Turqinë mbi çështje me interes të përbashkët si migrimi, shëndeti publik, klima, antiterrorizmi dhe çështjet rajonale”, thotë konkluzioni i katërt.
Financimi i sirianëve, çështja e Qipros
Udhëheqësit e BE-së gjithashtu i kanë kërkuar komisionit të paraqesë një propozim zyrtar për financimin e sirianëve në Turqi, Jordani, Liban dhe pjesë të tjera të rajonit pa vonesë, “në kontekstin e politikës së përgjithshme të BE-së për migracionin”.
“Këshilli Evropian kujton konkluzionet e tij të mëparshme dhe mbetet plotësisht i përkushtuar në zgjidhjen gjithëpërfshirëse të problemit të Qipros mbi bazën e një federate bikomunale, bizonale me barazi politike, në përputhje me rezolutat përkatëse të Këshillit të Sigurimit të OKB-së”, thuhet në konkluzion.
Konkluzioni shton se këshilli ndien keqardhje që “takimi jozyrtar i mbajtur në Gjenevë nën kujdesin e Kombeve të Bashkuara nuk i hapi rrugë rinisjes së negociatave zyrtare”.
Liderët kanë nënvizuar se BE-ja do të vazhdojë të marrë pjesë aktive në mbështetjen e procesit.
