Policia në jug të Japonisë sot njoftoi se është duke hetuar rastin ku tigri i bardhë ka vrarë rojen e kopshtit zoologjik, transmeton Anadolu Agency (AA).
Policia njoftoi se Akira Furusho u gjet të hënën në mbrëmje i shtrirë në dysheme duke gjakosur nga qafa në kafazin e tigrit të bardhë në Parkun Zoologjik Hirakawa në Kagoshima.
Menaxhmenti i kopshtit zoologjik tha se beson që Furusho u sulmua në momentet kur ka tentuar që kafshën ta zhvendosë nga kafazi ekspozues në atë të natës. Me peshë prej 170 kilogram ai është një nga 4 tigrat e rrallë të bardhë që ndodhet në kopshtin zoologjik të qytetit.
Furusho ndërroi jetë në spital. Rezultatet e autopsisë do të publikohen së shpejti. Policia thotë se askush nuk ka parë momentin e sulmit dhe se tigri është vënë në gjumë me pistoletë për gjumë. Ata thonë se janë duke hetuar nëse kopshti zoologjik ka vendosur masat e duhura të sigurisë.
Sipas mediave lokale, familja e të ndjerit Furusho, ka kërkuar nga kopshti zoologjik që të lënë tigrin të jetojë.
