Elbasani është qyteti i parë në të cilin ka nisur shpërndarja e materialeve zgjedhore në qendrat e votimit për zgjedhjet e 30 qershorit. Materialet po tërhiqen nga kryetaret e Njësisë Administrative të shoqëruar nga punonjësit e policisë.
Për të ndjekur procesin e ndarjes së materialeve zgjedhore, të pranishëm ishin dhe përfaqësues të të OSBE /ODIHR në Elbasan.
Raportohet se edhe në Qarkun Korçë janë shpërndarë bazat e materialeve zgjedhore nëpër qendrat e votimit.
Edhe në qendrat e votimit në Qarkun e Fierit janë shpërndarë materialet zgjedhore, shkruan ATA.
“Shpërndarja e materialeve zgjedhore ka filluar që në orën 10:00. Nuk ka pasur asnjë problematikë. Presim të vijnë edhe tre njësi të tjera dhe shpresojmë se deri pasdite do kemi përfunduar shpërndarjen e bazës materiale në të gjithë Fierin”, tha kreu i KZAZ-së Nr 58, Niko Neco.
Shpërndarja e materialeve ka vijuar edhe në qytetin Shkodrës në disa prej qendrave të votimit.
Edhe në kryeqytet, gjatë ditës së sotme ka vijuar procesi për shpërndarjen e materialeve zgjedhore më qendrat e votimit. Edhe në këto qendra, procesi është monitoruar edhe nga përfaqësues të OSBE-ODIHR .
Rreth 7326 efektivë të policisë do të jenë në krye të detyrës për procesin zgjedhor të ditës së diel në të gjithë Shqipërinë.
