Të paktën pesë persona kanë mbetur të plagosur pas të shtënave me armë në një lokal në pronësi të Fation Muratit në Tiranë.
Policia e Shtetit në një komunikim zyrtar bëri me dije se mes të plagosurve është edhe një 7-vjecare, ndërsa viktimë ka mbetur një grua.
“Në lokal është qëlluar me armë nga persona ende të paidentifikuar. Mimoza Paja ka mbetur viktimë dhe pesë shtetas të tjerë kanë mbetur të plagosur. Një vajzë 7 vjece është mes të plagosurve. Ngjarja e rëndë ka ndodhur në një lokal në pronësi të një shtetasi me precedent penal”, tha në një njoftim zyrtar Policia e Shtetit.
REAGIMI I PLOTE:
Më datë 12.03.2023, rreth orës 21:05, në rrugën “Ananstas Shundi”, në lokalin në pronësi të shtetasit F. M., në rrethana ende të paqarta, nga persona ende të paidentifikuar, është qëlluar me armë zjarri.
Si pasojë ka humbur jetën shtetasja Mimoza Paja, rreth 60 vjeçe, banakierja e lokalit, si dhe janë plagosur shtetasit S. M., 50 vjeç, A. M.,42 vjeç, E. S., 47 vjeç, E. B., 45 vjeç, G. Sh., 55 vjeç, të cilët ndodhen nën kujdesin e mjekëve.
Gjithashtu është lënduar në dorë nga ciflat e xhamave, një e mitur 10-vjeçare.
Për hetimin e kësaj ngjarjeje është ngritur një grup i posaçëm hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
Ndërkohë janë ngritur pika kontrolli në bashkëpunim me Drejtoritë Vendore të Policisë Durrës, Elbasan, Lezhë e Dibër.
Shërbimet e Policisë po vijojnë kontrollet në gjithë territorin ku dyshohet që mund të kenë lëvizur ose ku mund të fshihen autorët.
