Më shumë se 5.000 persona në të gjithë Turqinë janë gjobitur për shkak të pirjes së duhanit në automjete, bëri të ditur sot Ministria e Brendshme, transmeton Anadolu Agency (AA).
Gjithsej 37.065 efektivë në të gjithë vendin zbatuan të mërkurën politikën “ automjete pa tym” të ndihmuar nga 169 qen nuhatës.
Me këtë rast u kontrolluan rreth 150 mijë automjete.
Politika “automjetet pa tym” pasoi pas vërejtjeve të presidentit turk Recep Tayyip Erdoğan për gazetarët të shtunën, i cili tha: “Unë ndonjëherë shoh shoferë që pinë cigare në automjete dhe sa herë që i shoh i paralajmëroj. U them atyre se është e turpshme”. Tani ne jemi lëshuar në parandalimin e pirjes së duhanit nga shoferi dhe pasagjerët tjerë.
Erdoğan prej kohësh ka theksuar luftën kundër varësisë së duhanit në Turqi. Në korrik 2009, u vendos një ndalim i plotë i pirjes së duhanit në të gjitha hapësirat e mbyllura, përfshirë restorantet, baret dhe kafenetë ndërsa më vonë ndalesa u zgjerua edhe në vendet e tjera, siç janë stadiumet dhe oborret.
Gjithashtu, mbi 9.000 automjete u gjobitën për mungesë të dokumenteve të duhura dhe parregullsive. Gati 2.000 automjete u përjashtuan nga trafiku.
Rreth 693 të dyshuar, të kërkuar për krime të ndryshme, përfshirë vrasjen me dashje, anëtarësim në një grup të armatosur terrorist dhe krime të lidhura me drogën, u arrestuan gjatë kontrolleve.
Gjashtë persona të zhdukur, përfshirë dy fëmijë, gjithashtu u gjetën.
