Dyshimet se 3 milionë e 366 mijë euro vijnë nga droga, ka shtuar diskutimet në organin e akuzës që dosja e Durrësit të përcillet pranë Prokurorisë së Krimeve të Rënda.
Gjatë ditës kanë rezultuar pas sukses kontrollet për arrestimin e dy të kërkuarve Alfred Vladi, 33 vjeç dhe Elvis Vladi, 38 vjeç, të cilët janë kushërinj me njëri-tjetrin. Siç rezulton nga hetimi i forcës së ligjit në Prokurorinë Durrës, dy të rinjtë nga Peshkopia janë porositësit e ngarkesës së automjeteve që rezultoi me ngarkesën më të madhe të parave, raporton “Top Channel”.
Rezulton gjithashtu se njëri nga të kërkuarit, Elvis Vladi, ka qenë i skeduar nga autoritetet britanike. Gjatë 2015-ës, ai është prangosur gjatë një operacioni antidrogë së bashku me disa persona të tjerë për dyshimet e trafikut të kokainës, por në përfundim të gjykimit është shpallur i pafajshëm.
Nga ana tjetër, siç ka dyshime, Alfred Vladi ka njohje me Edi Canin dhe Alban Mollaymerit, që të dy ata me biznese në fushën e automjeteve dhe të transportit. Edhe Alfred Vladi rezulton të administrojë një biznes për dhënien e automjeteve me qira, selia e të cilës gjendet në Laprakë.
Nga një kërkim i thjeshtë në qendrën kombëtare të biznesit rezulton se ata kanë aktivitet edhe për transfertat e parave në sektorin jo bankar. Prokuroria ka marrë në pyetje të arrestuarit që po prisnin ngarkesën e mbi 3 milionë eurove, të cilët kanë mohuar të kenë lidhje dhe dijeni mbi to.