Vendi ynë po përballet me probleme, pas reshjeve të dendura të shiut të ditëve të fundit.
15 shtëpi janë në ujë në Obot të Shkodrës, disa fshatra në Fier dhe Lezhë po përballen me ndërprerje të energjisë elektrike, kurse në rruga e Currilave në Durrës ka rrëshqitje të dherave, duke sjellë bllokim të rrugës.
Shkodër
15 shtëpi janë në ujë në Obot të Shkodrës, pas reshjeve të dendura të shiut të ditëve të fundit. Aktualisht janë 1400 hektarë tokë e përmbytur, ndërsa ujësjellësi Oblika 1 është jashtë funksionit. Rruga e Obotit ka prezencë uji 65 cm, ka rënie me 15cm me orën 18.00 të një dite më parë. Në vendin e quajtur Urrelat e Shirqit , rruga Shirq-Darragjat ka prezencë uji në rrugë 30 cm, për momentin rruga është e pakalueshme me mjete, edhe pse ka rënie të nivelit prej 40 cm.
Niveli i lumit Drin shënon kuotën 5.85, ka rënie me 45 cm, në krahasim me një ditë më parë, ndërsa kuota maksimale është 7.50 m.Niveli i Liqenit shënon 8.40 m, ndërsa ka rënie prej 10 cm, në krahasim me një ditë më parë, ndërsa kuota maksimale është 8.70 m.
Lezhë
350 hektarë tokë bujqësore është aktualisht e përmbytur në qarkun e Lezhës, ku 100 hektarë janë në bashkinë Kurbin dhe 250 në bashkinë Lezhë. Në ish kënetën Gjonëm vijon të jenë rreth 100 ha tokë e përmbytur. Në ish-kënetën e Torovicës, njësia administrative Balldren, vijon të ketë 150 ha tokë të përmbytur. Në njësinë administrative Zejmen ka rreth 100 ha tokë bujqësore të përmbytur në ish kënetën Spiten –Tresh. Situata në bashkinë Mirditë paraqitet e qetë dhe reshjet e shiut janë me intensitet të ulët. Akse rrugore të bllokuara nuk raportohen. Gjendja e digave të ujëmbledhësave është nën monitorim të vazhdueshëm nga strukturat e MC të bashkive, deri tani nuk raportohen probleme.
Në territorin e qarkut Lezhë ka patur reshje shiu me intensitet të ulët, ku deri në mëngjes kanë rënë rreth 10 mm shi. Kuota lumit Drin është në nivelin +0.5 m, nga +2.0 m që është kuota kritike, kurse kuota e lumit Mat vazhdon të ketë gjendje të lartë duke shkuar tek normalja, për shkak të shkarkimeve të H/C Ulëz e Shkopet, 220 m³/s, kurse nga Diga Qafë Mollë e H/C mbi lumin Fan është rreth 39 m³/s, por pa krijuar probleme.
Durrës
Reshjet intensive të shiut gjatë natës së kaluar kanë rikthyer rrëshqitjet e dherave në kodrën e Currilave në Durrës. Shërbimet e ndërmarrjes po punojnë për zhbllokimin e këtij aksi rrugor dhe kthimin në normalitet të lëvizjes përgjatë tij. Dherat kanë mbuluar një pjesë të rrugës, duke shkaktuar edhe trafik për automjetet që ndërmarrin atë aks. Gjithashtu dherat kanë dëmtuar edhe murin e një prej ndërtesave që ndodhet në anën e kodrës.
Fier
Në fshatin Kutë të Mallakastrës ka ndërprerje të energjisë elektrike pas reshjeve të dendura të shiut. Situata në territorin e qarkut Fier aktualisht është e qetë dhe nga struktura vendore të MC nuk kemi raportime për situata problematike. Gjatë natës ka pasur reshje shiu me intensitet të ulët deri mesatar por pa shkaktuar kufizime në lëvizje apo akses në marrjen e shërbimeve .
Furnizimi me ujë të pijshëm nuk ka probleme. Akset rrugore, rurale dhe nacionale janë të kalueshme normalisht. Hidrovoret janë në gatishmëri të plotë pune. Niveli i ujit në lumenjtë Vjosa, Seman dhe Shkumbin është brenda shtratit dhe në kuota normale. Niveli i Vjosës në pikëmatjen e urës së Mifolit është 4 m.
Korçë
Në qarkun Korçë gjatë natës ka pasur reshje shiu dhe dëbore
me intesitet mesatar. Reshjet kanë qenë në formë dëbore në kuotën +1300 m, rruga e Dardhës km 9-km 12, trashësia deri 10 cm. Në akset rrugore nacionale dhe turistike qarkullimi i mjeteve bëhet pa probleme. Rekomandohet përdorimi i gomave dimërore gjatë kësaj periudhe. Kontraktorët janë në gatishmëri për mirëmbajtjen e rrugëve.
Këlcyrë
24 banorë të 5 familjeve në fshatin Katundisht në Këlcyrë kanë lënë banesat dhe janë strehuar përkohësisht tek bashkëfshatarët pasi lagjja Kalemaj në këtë fshat është përfshirë nga një rrëshqitje masive. Për pasojë shtëpitë kanë pësuar çarje, dëmtime serioze strukturore ndërsa janë duke u fundosur në baltë. Banesat që gjenden në shtratin e rrëshqitjes po zaptohen me ritëm të lartë nga balta dhe e gjithë lagjja është e pabanueshme për momentin. Banorët thonë se kanë humbur pasurinë e një jete dhe se nuk kanë ku të shkojnë. Disa hektarë tokë në përdorim të fshatit kanë dalë jashtë funksionit si dhe është krijuar një emergjencë për bagëtitë që janë i vetmi burim të ardhurash për fshatin.
