Gjykata e Tiranës dënoi me 500 mijë lekë gjobë ish-kryeministrin Sali Berisha, i cili ishte paditur nga kryeministri Edi Rama për shpifje.
Bëhet fjalë për një status të publikuar në faqen zyrtare të ish-kryeministrit 1 vit më parë, më konkretisht më 14 tetor 2018, ku ky i fundit akuzonte kreun e qeverisë, Edi Rama si përgjegjës për bllokimin e negociatave me Bashkimin Evropian duke përkrahur bandat e drogës, raporton EuroNews.
Gjykata arriti në përfundimin se ajo çfarë ishte publikuar nga ish-kryeministri nuk ishte bazuar në fakte dhe prova të cilat Berisha dështoi t’i sillte.
Në përfundim gjykata vendosi të dënonte me një gjobë prej 500 mijë lekësh ish-kryeministrin dhe përgënjeshtrimin nga ana e tij të statusit në fjalë.
“Te dashur miq, kohet e fundit jo vetem qeveri te vendeve kryesore te Bashkimit Europian por dhe vet Parlamenti Europian dhe me ne fund edhe Komisioni Europian jane deklaruar hapas kunder diskutimit per hapjen e negociatave me Shqiperine per shkak te krimit te organizuar ne nivelet me te larta te pushtetit, me fjale te tjere per shkak te familjeve mafioze Rama – Xhafa – Balla –Tahiri”, shkruante një vit më parë ish-kryeministri.
