Kryetari i Kuvendit të Shqipërisë, Gramoz Ruçi, realizoi një takim me një delegacion të Komisionit për Marrëdhënie Ndërkombëtare dhe Emigrantët të Parlamentit të Malit të Zi, kryesuar nga kryetari i këtij komisioni, Andrija Nikoliç, transmeton Anadolu Agency (AA).
Kryeparlamentari Ruçi gjatë takimit ka theksuar se Shqipëria sugjeron që partive politike shqiptare t’u krijohet më shumë hapësirë përfaqësimi në Parlamentin e Malit të Zi, thuhet në njoftimin e Kuvendit të Shqipërisë.
“Vullneti politik për zgjerimin e bashkëpunimit midis të dy vendeve, duhet të pasqyrohet në rritjen e bashkëpunimit ekonomik e tregtar, duke shmangur zvarritjet e zbatimit të marrëveshjeve të nënshkruara, për të cilat pala shqiptare është shumë e gatshme dhe e përkushtuar për t’i ratifikuar. Ne nxisim Qeverinë e Malit të Zi për më tepër investime në zonat e banuara nga shqiptarët, për zbatimin e planeve zhvillimore që mundësojnë hapjen e vendeve të reja të punës, në funksion të ndalimit të emigrimit dhe shpopullimit të këtyre zonave”, ka theksuar Ruçi.
Nikoliç, sipas njoftimit, shprehu vullnetin për zgjerimin e bashkëpunimit midis dy parlamenteve dhe komisioneve përkatëse.
“Ne mund të bashkëpunojmë shumë mirë për të dhënë përvojën tonë në përgatitjen dhe zhvillimin e negociatave të anëtarësimit, duke ofruar praktikat tona më të mira e të suksesshme”, është shprehur Nikoliç gjatë takimit.
Më tej theksohet se Ruçi dhe Nikoliç u shprehën optimist se bashkëpunimi midis Shqipërisë dhe Malit të Zi po forcohet në kontekstin e ri rajonal, në rritjen e besimit reciprok dhe çlirimin e vendeve të rajonit prej inercive të së kaluarës, çka tregoi, sipas tyre, edhe ratifikimi i Marrëveshjes së Prespës nga Parlamenti i Maqedonisë dhe Parlamenti i Greqisë.
Delegacioni i Parlamentit të Malit të Zi do të realizojë takime edhe me zyrtarë të tjerë të Kuvendit të Shqipërisë, për të diskutuar rreth bashkëpunimit mes dy vendeve, sidomos mes dy parlamenteve.
