Presidenti i Rusisë, Vladimir Putin, tha se paqja dhe siguria në botë varen nga rrjedha e marrëdhënieve mes Rusisë dhe SHBA-së, transmeton Anadolu Agency (AA).
Putin ka pritur në rezidencën e Kremlinit ambasadorët e 23 vendeve që kanë filluar detyrën në vend, të cilët i kanë paraqitur letrat krendenciale.
Gjatë fjalimit të mbajtur në këtë pritje, Putin ka tërhequr vëmendjen për situatën e rrezikshme në botë. “Konfliktet rajonale po shumohen, kërcënimet e terrorizmit dhe ekstremizmit janë në rritje, sistemi i kontrollit të armëve po rrënohet. Po ashtu edhe ekonomia globale ndodhet në situatë të destabilizuar”, theksoi Putin.
Më tej duke vlerësuar marrëdhëniet Rusi-SHBA, presidenti Putin deklaroi se “Paqja dhe siguria në botë varen nga situata e marrëdhënieve mes Rusisë dhe SHBA-së”.
Gjithashtu lideri rus tha se ata janë të gatshëm të krijojnë një dialog gjithëpërfshirës me SHBA për çështje të tilla si kontrolli armëve, lufta kundër terrorizmit dhe zgjidhja e krizave rajonale.
Pasi ka përmendur edhe rëndësinë e marrëveshjes bërthamore me Iranin, Putin tha se “Rusia do të vazhdojë të tregojë përpjekje për mbrojtjen e kësaj marrëveshjeje”.
Putin ndër të tjera theksoi se bota ndodhet përballë rrezikut të epidemisë së koronavirusit të ri (2019-nCoV) dhe se lidhur me këtë çështje janë të gatshëm t’i ofrojnë ndihmë Kinës.
