Reforma në drejtësi do të sjellë edhe rihapjen e dosjeve të bujshme dhe deputetët e Partisë Socialiste janë të bindur për këtë gjë. Një sërë dosjesh të rëndësishme si “Gërdeci”, “21 Janari”, afera e CEZ apo edhe afera e Rrugës Durrës-Kukës janë mbyllur gjatë kohës që në krye të Prokurorisë së Përgjithshme qëndronte Adriatik Llalla. Mirëpo vendimi për mbylljen e këtyre çështjeve ka shkaktuar shumë polemika përgjatë gjithë kësaj kohe, ku shumë shpesh është artikuluar në media nga personalitete të ndryshme se përgjegjësit e vërtetë të ndodhive të lartpërmendura nuk janë vënë përpara drejtësisë. Deputetët socialistë shprehen se me qëllim që kjo gjë të ndryshojë dhe tashmë të implikuarit kryesorë të përballen me drejtësinë tashmë është miratuar reforma në drejtësi. Mirëpo edhe në rast se edhe me ngritjen e organeve të drejtësisë gjërat nuk ndryshojnë dhe nuk shihen lëvizje në këtë drejtim, mazhoranca e ka menduar një plan B. Ajo është e gatshme që të hartojë dhe miratojë edhe një ligj specifik nëse është nevoja që i detyron organet e drejtësisë të rigjykojnë dosjet e famshme. Një gjë të tillë e konfirmoi për gazetën “SOT” dje deputeti i PS në Fier, Bujar Çela. “Unë mendoj që nuk ka asnjë nevojë për ligj specifik sepse nuk ka gjëra të mbyllura përfundimisht. Vetëm kur kufomat tona mbyllen në varr, atëherë nuk kanë nevojë të hapen jo se nuk hapen. Ndërsa këto janë kufoma që vazhdojnë të mbajnë erë dhe janë të detyruara të hapen. Edhe në rast se do të kërkohet bërja e një ligji specifik për të rihapur këto çështje të shekullit të këtyre 30 viteve pa të cilat nuk mund të kuptohet bërja e reformës në drejtësi. Nuk besoj që ka pengesa ligjore dhe mazhoranca i ka të gjitha këto hapësira për ta miratuar këtë ligj nëse do të jetë e nevojshme”, tha ai.
Drejtësia nis me çështjen “Hajdari”
Deputeti Bujar Çela lëshoi edhe një paralajmërim gjatë prononcimit të tij. Ai theksoi se dosja “Hajdari” do të jetë e para që do të shënojë edhe fillimin e një ere të re për drejtësinë shqiptare. “Mazhoranca është e interesuara për ta bërë reformën në drejtësi. Duke përmendur edhe dosjen “Hajdari”, dua të them se ka shumë dosje të tjera që duan të rihapen. Fakti është se këto dosje mund të rihapen kollaj sepse personat përgjegjës janë në pozicione drejtuese. Kemi përmendur gjithmonë peshqit e mëdhenj, reformën në drejtësi, pushteti i qytetarëve, integrimi etj, dhe të gjitha këto mëshirohen më së miri në këto dosje”, deklaroi Bujar Çela.
Reagimet e deputetëve të tjerë
Në të njëjtën linjë me Bujar Çelën ishin edhe dy deputetët e tjerë të Partisë Socialiste, Xhemal Qefalia dhe Andrea Marto. Qefalia deklaroi për gazetën “SOT” se me reformën në drejtësi gjërat do të shkojnë në vendin e caktuar. “Unë kam përshtypjen që nuk është mungesa e ligjit sesa ka qenë mungesa e vullnetit të politikës dhe kryesisht të sistemit të drejtësisë për t’i hetuar këto ngjarje. Kështu që nuk është se kërkon ligj të veçantë për aq kohë sa në dosjet dhe në arkivat e prokurorisë janë të gjitha materialet e ngjarjeve, të cilat tashmë janë gati, gjithçka është gati. Ndërkohë që me spastrimin e sistemit të drejtësisë gjithçka do të vendoset në vendin e vet”, theksoi ligjvënësi i PS, Xhemal Qefalia. Ndërsa socialisti tjetër, Andrea Marto u shpreh se rigjykimi i dosjeve të bujshme nuk do të kushtëzohet nga hartimi i një ligji specifik, duke lënë kështu të nënkuptohet se mazhoranca është gati ta bëjë një gjë të tillë. “Dosjet e bujshme duhet të rihapen, edhe nëse nevojitet hartimi i një ligji specifik”, tha përfaqësuesi i PS në qarkun e Vlorës, Andrea Marto
