Presidenti pakistanez, Mamnoon Hussain, përshëndeti marrëdhëniet “e fuqishme” dypalëshe me Turqinë, duke thënë se ato nuk do të ndikohen nga cilido ndryshim në sistemin politik.
Në një intervistë speciale për Anadolu Agency (AA), Hussain tha se “Marrëdhëniet midis Turqisë dhe Pakistanit nuk mund të përshkruhen me fjalë. Është një lloj shumë i veçantë i marrëdhënieve midis dy kombeve tona”.
Hussain arriti në Ankara për të marrë pjesë në ceremoninë e inaugurimit të presidentit Recep Tayyip Erdoğan.
“Këto marrëdhënie bazohen në trashëgiminë, kulturën, fenë dhe ato janë lidhje shumë të forta. Unë mendoj se me kalimin e kohës, këto marrëdhënie do të avancohen”, tha ai.
Gjatë intervistës së tij, Hussain përgëzoi Erdoğanin, duke e quajtur atë “vëlla”. “Shpresoj dhe lutem për prosperitetin dhe mirëqenien e kombit turk dhe të ardhmen,” tha ai.
Vota e 24 qershorit shënoi tranzicionin e Turqisë në një sistem ekzekutiv presidencial të qeverisë, duke larguar postin e kryeministrit, ndër të tjera.
Sipas Këshillit të Lartë Zgjedhor të Turqisë (YSK) Erdoğan fitoi shumicën absolute në zgjedhjet presidenciale me 52.5 për qind të votave.
Hussain tha se “Unë mendoj se marrëdhëniet nuk ndryshojnë me ndryshimet në sistemin politik dhe ndryshimet e tjera kudo në botë. Marrëdhëniet mes dy vendeve tona janë në lidhje shumë të forta. Nuk ka rëndësi se çfarë ndodh në botë dhe çfarë ndryshimesh ekzistojnë”, shtoi ai.
Udhëheqësi pakistanez gjithashtu shfaqi shpresën se marrëdhëniet në fushën e politikës, mbrojtjes, arsimit dhe tregtisë do të avancohen edhe më tej.
“Shpresoj që në të ardhmen, do të përmirësojmë marrëdhëniet tregtare, sepse kjo është shumë e rëndësishme. Turqia është një vend shumë i rëndësishëm i këtij rajoni, duke ecur shumë mirë në fushën e ekonomisë. Ne dëshirojmë të kemi shkëmbime të produkteve tona me produktet turke”, tha presidenti pakistanez.
– Bashkëpunimi në mbrojtje
Duke iu referuar veprimeve të fundit të Turqisë për të shitur anije korveta në Pakistan, ai tha se “Është një gjë e mrekullueshme që po marrim këtë pajisje nga Turqia. Turqia dhe Pakistani i kanë bërë këto gjëra për një kohë shumë të gjatë “.
Ministri turk i Mbrojtjes, Nurettin Canikli, tha të enjten se Turqia do t’i shiste katër anije korveta Marinës së Pakistanit pasi fitoi tenderin.
Hussain tha se Turqia dhe Pakistani do të jenë shumë afër njëra-tjetrës dhe do të bashkëpunojnë në sektorë të ndryshëm.
Një grup dypalësh i dialogut u krijua në vitin 2003 për të sugjeruar politikat dhe planet për bashkëpunim në fushën e mbrojtjes midis dy vendeve.
Në vitin 2016, Turqia dhuroi Pakistanit 34 avionë T-37 dhe pjesët e tyre rezervë.
– Aktivitetet e TIKA-s
Në fjalën e tij, presidenti pakistanez vlerësoi gjithashtu aktivitetet e Agjencisë Turke për Bashkëpunim dhe Koordinim (TIKA) në vendin e tij.
Ai tha se “TIKA ka qenë shumë aktive në ofrimin e ndihmës për njerëzit e prekur në Pakistan (gjatë tërmeteve dhe përmbytjeve). TIKA ka formuar shumë shkolla në Pakistan si dhe një spital gjithashtu është themeluar nga TIKA”.
Ai theksoi se “TIKA është duke bërë një punë të mrekullueshme për të ndihmuar njerëzit tanë pakistanezë kudo që të nevojitet diçka”.
– Anëtarësimi në SCO
Hussain tha se Pakistani do ta mirëpres Turqinë me gëzim nëse bëhet vend anëtar i Organizatës së Bashkëpunimit të Shangait (SCO).
“Unë mendoj se organizata do të përfitojë kur Turqia të bëhet anëtare e SCO-së. Strategjikisht, mendoj se Turqia do të ndihmojë SCO në një mënyrë shumë të mirë”, tha ai.
SCO është një organizatë euroaziatike politike, ekonomike dhe e sigurisë e themeluar në vitin 2001. Fillimisht përfshinte Rusinë, Kinën, Kazakistanin, Kirgistanin, Taxhikistanin dhe Uzbekistanin.
