Gjykata Kushtetuese e Pakistanit ka vendosur se ndalimi i ish-kryeministrit Imran Khan është “i paligjshëm” dhe se ai duhet të lirohet menjëherë, transmeton Anadolu.
Sipas televizionit “Geo News”, ankesa e Partisë së Lëvizjes për Drejtësi në Pakistan (PTI) kundër arrestimit të Khan-it u shqyrtua në Gjykatën Kushtetuese. Gjykata vendosi se arrestimi i ish-kryeministrit Khan ishte “i paligjshëm” dhe ai duhet të lirohet menjëherë.
Qeveria e Imran Khan kishte rënë me 174 vota “kundër” në votëbesimin e mbajtur në Parlamentin e Pakistanit më 10 prill 2022.
Shahbaz Sharif, vëllai i Nawaz Sharif, i cili shërbeu si kryeministër për tre mandate në vend, u zgjodh kryeministër me mbështetjen e shumicës absolute me 174 vota në zgjedhjet e mbajtura në Parlament më 11 prill 2022.
Khan filloi një marshim nga Lahore në Islamabad më 28 tetor 2022, me arsyetimin se qeveria e koalicionit nuk shpalli zgjedhje të parakohshme. Khan u plagos në të dyja këmbët pasi kolona e tij u qëllua në Wazirabad më 3 nëntor 2022. Një person mbeti i vrarë dhe 13 të tjerë u plagosën nga sulmi.
Më 8 maj, ushtria pakistaneze i përshkroi pretendimet e ish-kryeministrit Khan se një zyrtar i lartë i inteligjencës qëndronte pas atentatit të tij si “të papërgjegjshme dhe të pabaza”.
Khan u arrestua më 9 maj me vendim të Byrosë Kombëtare të Përgjegjshmërisë (NAB). Zhvillimi në fjalë erdhi pasi Khan akuzoi një zyrtar të lartë të inteligjencës se qëndron pas atentatit kundër tij.
