Ministri i Punëve të Jashtme të Maqedonisë së Veriut, Bujar Osmani priti në takim kryenegociatorin e Shqipërisë me Bashkimin Evropian, Zef Mazi, i cili sot po qëndron për një vizitë në vend, raporton Anadolu Agency (AA).
Pas takimit, të dy bashkëbiseduesit mbajtën një konferencë të përbashkët për media.
“Maqedonia e Veriut dhe Shqipëria së bashku filluan procesin e skriningut shpjegues në vitin 2018, proces ky të cilin dy vendet e përfunduan me sukses në fund të vitit 2019. Të dy vendet morën ‘dritën e gjelbër’ për fillimin e negociatave në mars të këtij viti dhe në përputhje me rrethanat, të dy vendet meritojnë të mbajnë konferencat e para ndërqeveritare dhe të fillojnë negociatat pa asnjë vonesë. Dua të theksoj se me z. Mazi arritëm në përfundimin se samitet e ardhshme të BE-së janë një mundësi unike sepse BE-ja do të tregojë në praktikë besueshmërinë e procesit të zgjerimit dhe kështu të ruajë idenë evropiane si motori kryesor i ndryshimit pozitiv në rajon”, tha Osmani.
Ai shtoi se ata gjithashtu me Mazin kanë biseduar metodologjinë e re për negociatat me BE-në.
“Metodologjia e re parashikon udhëheqje më të fortë politike të vetë procesit të negociatave, rol më të madh të vetë vendeve anëtare në monitorimin dhe vlerësimin e procesit të negociatave, kështu që roli i Rrjetit tonë Diplomatik në kryeqytetet e BE-së fiton një rëndësi dhe përgjegjësi shtesë për negociatat e suksesshme”, tha Osmani.
Osmani gjithashtu theksoi se është i vetëdijshëm se një nga çështjet më aktuale këto ditë është çështja e ndarjes së mundshme të Shqipërisë nga Maqedonia e Veriut për sa i përket procesit të integrimit evropian, për të cilin ai tha se ishte i kënaqur të rikonfirmonte pozicionet e tyre si fqinj të ngushtë dhe miq të sinqertë, se Maqedonia e Veriut dhe Shqipëria mbështesin njëra-tjetrën në rrugën drejt integrimit evropian dhe se në këtë rrugë ata vetëm mund të ndihmojnë njëra-tjetrën dhe asnjëherë ta pengojnë njëra-tjetrën.
Kryenegociatori për negociatat e pranimit të Shqipërisë në BE, Mazi tha se pozicioni i Shqipërisë mbi zgjerimin e BE-së që nga viti 1992 është i pandryshuar, duke theksuar se një qasje e tillë duhet të shihet nga vetë vendet anëtare të BE-së.
“Procesi i anëtarësimit të vendeve tona, në rastin e Shqipërisë, nuk duhet të ndërpritet, duhet të përshpejtohet, si për Shqipërinë ashtu edhe për Maqedoninë e Veriut, në mënyrë që të mos ketë më vonesa. Vonesat praktikisht na bëjnë të gjithëve humbës. Vonesa do të jetë në dëm të Shqipërisë për shkak të besimit të qytetarëve në procesin e zgjerimit dhe do të dëmtojë besueshmërinë e BE-së. Procesi i zgjerimit duhet të vazhdojë në përputhje me parimin e vjetër të BE-së ndaj meritave”, tha Mazi.
Ai shtoi se Shqipëria plotësoi të gjitha kërkesat dhe kushtet e Komisionit Evropian në mars 2020 për mbajtjen e konferencës së parë ndërqeveritare dhe se kjo u konfirmua nga kreu i KE-së.
