Ministria e Punëve të Jashtme e Türkiyes ka thirrur ambasadorin suedez në vend, Staffan Herrstrom, për shkak të propagandës terroriste që ishte projektuar për ambasadën turke në Stokholm, raporton Anadolu Agency (AA).
Sipas burimeve diplomatike, ambasadori Herrstrom u thirr në ministrinë turke pasi elementët e lidhur me grupin terrorist PKK projektuan deklarata dhe fotografi që përmbanin propagandë terroriste dhe imazhe fyese kundër presidentit turk, Recep Tayyip Erdoğan, në godinën e kancelarisë së ambasadës.
Burimet njoftuan se zyrtarët turq i përcollën ambasadorit Herrstrom ”pritjet që autorët e këtij akti të papranueshëm të identifikohen, të merren masat e nevojshme dhe të merren hapa konkrete në dritën e angazhimeve në Memorandumin Trepalësh”.
Suedia dhe Finlanda në muajin qershor aplikuan zyrtarisht për t’u anëtarësuar në NATO, një vendim i shkaktuar nga lufta e Rusisë kundër Ukrainës.
Megjithatë, Türkiye shprehu kundërshtime për aplikimet e anëtarësimit, duke kritikuar vendet për tolerim dhe madje edhe mbështetje të grupeve terroriste.
Një memorandum trepalësh në samitin e NATO-s, i nënshkruar midis vendeve në muajin qershor, përcakton se Finlanda dhe Suedia nuk do të ofrojnë mbështetje për YPG/PYD-në, degën siriane të PKK-së, apo për organizatën terroriste FETO, grupit që qëndron pas grusht shtetit të dështuar të vitit 2016 në Türkiye.
