Ministri turk i Mbrojtjes, Hulusi Akar, së bashku me zyrtarë të nivelit të lartë ushtarak vizituan provincën juglindore Şırnak në Turqi për të festuar Fitër Bajramin me ushtarë në detyrë në kufirin e vendit me Irakun, raporton Anadolu Agency (AA).
Duke folur me gazetarët, Akar tha se fqinjët grekë të Turqisë duhet të heqin dorë nga provokimet, gjuha kërcënuese, deklaratat e rreme dhe të pasakta.
“Ata që e quajnë Turqinë “ekspansioniste” duhet të shikojnë në hartë midis viteve 1821 dhe 2020 … këto janë deklarata jashtëzakonisht të pasakta, të papajtueshme me marrëdhëniet e fqinjësisë së mirë dhe të drejtën ndërkombëtare dhe janë provokime”, tha ai.
“Ne presim që fqinjët tanë grekë të lënë këtë gjuhë të tensionuar dhe të përshkallëzuar”, tha ministri Akar
Ministri i Mbrojtjes tha se Turqia do të vazhdojë të mbrojë të drejtat e saj, si dhe ato të qipriotëve turq, në Mesdheun Lindor dhe Egje.
“Ne jemi në favor të dialogut, ligjit dhe marrëdhënieve të fqinjësisë së mirë, por kurrë nuk do të lejojmë që të drejtat tona të shkelen”, tha ai.
Turqia gjithmonë ka mbështetur qipriotët turq dhe do të vazhdojë ta bëjë këtë, tha ai, duke shtuar se nuk ka asnjë alternativë tjetër përveç njohjes së Republikës Turke të Qipros Veriore si një shtet i pavarur dhe sovran.
“Si Republikë e Turqisë, ne kemi bërë gjithçka që duhet të bëhet që kjo të ndodhë dhe do të vazhdojmë ta bëjmë. Në këtë kontekst, do të përmbushim çdo detyrë që bie mbi Forcat e Armatosura Turke”, tha Akar.
Marrëdhëniet Turqi-Egjipt
Akar foli gjithashtu mbi marrëdhëniet midis Turqisë dhe Egjiptit, duke thënë se përmirësimi i marrëdhënieve dypalëshe do të jetë i dobishëm për të dy kombet, të cilat kanë histori dhe vlera të përbashkëta të rrënjosura thellë.
“Sidomos marrëdhëniet midis Turqisë-Libisë-Egjiptit do të sjellin përfitime për të gjitha vendet dhe palët. Shpresojmë që të gjitha palët t’i qasen çështjes me këtë mirëkuptim dhe që marrëdhëniet tona të arrijnë nivelin që duhet të jenë, sa më shpejt të jetë e mundur”, u shpreh ai.
Ai po ashtu preku blerjen nga Turqia të sistemit raketor S-400, duke thënë se ai është për qëllime mbrojtëse dhe nuk përbën kërcënim për askënd.
