Martesa mes personave të të njëjtit seks nuk do të jetë më krim në Indi. Në një lëvizje historike, Gjykata e Lartë e vendit rrëzoi një vendim të vitit 2013, i cili mbante në fuqi ligjin e epokës koloniale, të njohur si “Seksioni 377”, ku marrëdhëniet homoseksuale konsideroheshin “një shkelje e panatyrshme”.
Ky ka qenë një nga ligjet më të vjetër në botë që ka penalizuar lidhjet brenda të njëjtit seks dhe India ngurronte shumë ta përmbyste.
Përkrahësit e fushatës për rrëzimin e ligjit polemizues brohoritën me të madhe përpara dyerve të gjykatës, kur u dha lajmi i vendimit të saj, e disa shpërthyen në lot.
“Kriminalizimi i marrëdhënieve seksuale është joracional, arbitrar dhe dukshëm jokushtetues”, deklaroi kreu i drejtësisë, Dipak Misra, gjatë leximit të vendimit në Nju Delhi, raporton TCh.
Ligji 157-vjeçar i kohës koloniale i ndëshkonte akte të caktuara seksuale me 10 vite burg. Komuniteti indian i homoseksualëve dhe transgjinorëve ka luftuar për një kohë të gjatë që ky ligj të rrëzohej, duke e cilësuar edhe vet ekzistencën e tij si provë të qartë diskriminimi ndaj tyre.
