Për një të huaj është padyshim dhimbje koke leximi i çdo sinjalistike rrugore në një gjuhë tjetër. Megjithatë në kohërat që po jetojmë nuk ka për të qenë e vështirë për ti gjetur një zgjidhje këtij irritimi.
Aplikacioni Google Translate ka një funksion të përkthimit të tekstit përpara kamerës së telefonit dhe është i disponueshëm prej kohësh.
Kompania ka punuar për përmirësimin e këtij funksioni jo vetëm duke bërë më të shpejtë përkthimin por edhe sjellë mbështetje për 60 gjuhë së bashku me identifikimin automatik të gjuhës.
Më përpara duhej të zgjidhnit gjuhën e tekstit që dëshironit të përkthenit manualisht. Me përditësimin e ri mjafton të drejtoni kamerën drejt tekstit dhe aplikacioni automatikisht do të njohë gjuhën.
Për ta përdorur këtë funksion duhet të zgjidhni opsionin “Detect Language” si gjuha e tekstit në fjalë. Google gjithashtu ka rifreskuar ndërfaqen dhe vendosur opsionet e skanimit dhe importimit në fund të ekranit për akses më të lehtë.
Përkthimi i tekstit përmes kamerës ofrohet edhe për gjuhën Shqipe. Listën e plotë të gjuhëve të mbështetura nga funksioni në fjalë e gjeni në këtë lidhje. /PCWorld Albanian
