Kamerat e Anadolu Agency (AA) kanë filmuar vendin e operacionit të Shteteve të Bashkuara të Amerikës (SHBA) gjatë të cilit u raportua të jetë vrarë kreu i organizatës terroriste DEASH, Abu Bakr al-Baghdadi.
Në operacionin në të cilin u pohua të jetë vrarë Baghdadi në provincën Idlib të Sirisë, njësitë amerikane zbarkuan me helikopterë dhe zhvilluan një përleshje që zgjati rreth katër orë.
AA xhiroi vendin ku u zhvillua përleshja.
Në pamjet e realizuara shihet një shtëpi e rrafshuar me tokën, një automjet i djegur, si dhe tenda dhe shtëpi të civilëve të dëmtuara.
Siç shihet, në ngjarjen e zhvilluar në një zonë mes drunjsh të ullirit, bombardimet kanë shkaktuar edhe gropa.
Ndryshe, operacioni, në të cilin u përdorën helikopterë dhe dronë, u zhvillua në mesnatë në afërsi të fshatit Barisha.
Vendndodhja fillimisht ishte goditur nga tetë helikopterë amerikanë dhe dy dronë për më shumë se një orë e gjysmë.
Më pas, helikopterët shpërndanë në tokë njësinë tokësore për të zhvilluar një përleshje që ka zgjatur rreth dy orë e gjysmë. Helikopterët amerikanë janë larguar nga zona pas një periudhe totale prej katër orësh.
Lidhur me operacionin, Ministria turke e Mbrojtjes tha në një deklaratë se “para operacionit të mbrëmshëm të SHBA-së në Idlib, kishte këmbim informacionesh dhe koordinim mes autoriteteve ushtarake”.
Sipas mediave amerikane, zyrtarët i Pentagonit kanë thënë se Baghdadi është “i vdekur, por pritet verifikimi”.
Sipas raportimeve në fjalë, zyrtarët ushtarkë që e kanë informuar Shtëpinë e Bardhë pas operacionit janë shprehur se janë “shumë të sigurtë se Baghdadi është vrarë”.
