Presidenti i Türkiyes, Recep Tayyip Erdoğan, tha se vendi i tij është i gatshëm të ndihmojë Hungarinë në furnizimin me gaz natyror nëpërmjet Gazsjellësit Trans-Anatolian (TANAP), raporton Anadolu.
“Ne, (Türkiye) së bashku me Azerbajxhanin, jemi të gatshëm të ofrojmë të gjitha mjetet e mbështetjes në dërgimin e gazit natyror në Hungari nëpërmjet TANAP-it”, tha Erdoğan në një konferencë të përbashkët shtypi me homologen e tij vizituese hungareze Katalin Novak në Kompleksin Presidencial në kryeqytetin Ankara.
Duke përshëndetur marrëdhëniet e gjata midis dy vendeve, Erdoğan tha se “dora e ndihmës” që Hungaria i zgjati Türkiyes pas tërmeteve shkatërruese në shkurt ishte “shembull i fortë” i këtyre marrëdhënieve të forta.
“Ne diskutuam aspekte të ndryshme të marrëdhënieve Türkiye-Hungari në takimet që mbajtëm sot”, shtoi ai.
Presidenti turk tha gjithashtu se vendi i tij pret që Hungaria “të vazhdojë gjithnjë e më shumë mbështetjen e saj për të bërë përparim në agjendën pozitive në marrëdhëniet Türkiye-BE”.
I pyetur në lidhje me luftën e Rusisë kundër Ukrainës, presidenti Erdoğan tha se Ankaraja dëshiron të sjellë së bashku Moskën dhe Kievin për të filluar negociatat dhe “për t’i dhënë fund luftës me paqe në tryezë”.
Nga ana e saj, presidentja Novak përshëndeti rolin e Türkiyes në nismën e drithit të Detit të Zi dhe kërkoi një armëpushim të menjëhershëm midis Rusisë dhe Ukrainës.
Ajo më tej vuri në dukje se Türkiye është “e domosdoshme për sigurinë energjetike të Hungarisë” dhe theksoi se vendi i saj ka nevojë për Rrjedhën Turke.
Novak kujtoi gjithashtu rolin e Türkiyes në luftimin e migracionit të paligjshëm, duke thënë se vendi është “kyç” në parandalimin e tij.
