Fushata e anëtarësimeve të reja në Partinë Socialiste ndali Edi Ramën në Lezhë, ku u shpjegoi të rinjve të FRESSH-it ndryshimin që sipas tij arrin të sjellë politika.
“Politika dje thoshte se kush fitonte më pak duhet të paguante më shumë, që një furrë buke në Lezhë duhet të paguajë më shumë taksa se 15-katëshi në Tiranë. Sot, është e kundërta”, u shpreh Rama.
Sipas Ramës ka disa tipare që e bëjnë PS-në unike mes forcave politike shqiptare.
“E vetmja që s’ka tradhtuar interesat kombëtare dhe që di të bëjë qytete”, tha kryeministri.
Socialistëve të rinj u bëri edhe një përshkrim të kundërshtarit.
“Dele me makina bashkë, për ta është vizion, Bathorja mrekullia e 8, vizion që të çon për lesh dhie”, tha Rama.
Për ata që i kërkojnë rezultatet e reformave, Kryeministri pranoi se frytet e tyre do t’i gëzojnë gjeneratat e tjera.
“Reformat që bëjmë sot janë baza e nesërme, do i gëzojnë ata që sot janë fëmijë”.
Ne Lezhën e Fishtës është deputet Pjerin Ndreu, që përfitoi nga rasti t’i çonte fjalë kolegeve të partisë se edhe ai ka libra.
“Kam një bibliotekë të madhe…. do ja them edhe Mirelës, por po ja them kryeministrit”, tha Ndreu.
Deputeti socialist Pjerin Ndreu, gjatë fjalës së tij në fushatën për anëtarësimet e reja në Lezhë, ka recituar disa vargje të Migjenit.
Ligjvënësi tregoi se me Ramën është njohur kur ai ishte polic dhe kryeministri nuk mund të ikte nga Lezha pa disa vargje të Migjenit.
“Rini thuaja këngës ma të bukur që din ti, thuaja kanges, rini, pash syt e tu…”, recitoi Ndreu. Ndërkohë nuk kishte si të mungonte reagimi i kryeministrit i cili shkëmbeu një batutë. “Mirëkuptoni emocionet e mija pasi një ish polic reciton poezi”, tha kryeministri Rama.
Burimi: Top Channel
