Aeroporti i Vlorës nuk është më për kryeministrin Edi Rama thjesht një premtim elektoral. Vlonjatëve u tha se përmes këtij investimi, që pritet të nisë muajt në vijim, qeveria do t’i japë fund tarifave tejet të larta të çmimeve që ofron i vetmi aeroport në vend, ai “Nënë Tereza”.
Investimet publike në zonën e Vlorës i sheh si një domosdoshmëri jo vetëm në funksion të përmirësimit të cilësisë së jetës së banorëve, por edhe turizmit e punësimit. Si deputet i këtij qarku me modesti foli për një nga projektet që sikundër Sheshi “Skëndërbej” u renditën ndër më të mirët në Barcelonë.
Nga pikëpamja e parametrave do të jetë jashtëzakonisht cilësor dhe nga pikëpamja e çmimeve do të jetë shumë më i favorshëm për udhëtarët, qofshin vendas, e qofshin vizitorë. Ky do të jetë aeroporti i Vlorës, punimet për të cilin prisin të nisin shumë shpejt.
“Jemi drejt përfundimit të negociatave që të kemi aeroportin e Vlorës me tarifat më të ulëta në rajon. Kjo ka qenë kërkesa jonë”.
Kryeministri Edi Rama rendit përfitimet që do të sjellë ndërtimi iaeroportit të Vlorës.
“27 mijë vende pune drejtpërdrejt është minimumi për 4-5 vitet e ardhshme. Aeroporti do të jetë me paga goxha të larta në raport me mesataren që ne jemi mësuar”
Në prezantimin e projekteve për Qarkun Vlorë, kryeministri Edi Rama risolli në vëmendje Lungomaren, e cila do të jetë gati sezonin e ardhshëm
“Më vjen shumë mirë që nuk kam asnjë ankesë në telefon apo në facebook nga Vlora, që u bllokuam apo më ka lënë makina, e shikoj që ia vlejti sakrifica e ndërtimit, e bllokimit dhe e durimit”.
Projekti i Lungomares është një ndër tre projektet finalist që u prezantuan në konkursin që u zhvillua në barcelonë për hapësirën më të mirë publike 2017. Këto modela tha kryeministri duhet të kuptohen drejt jo siç i interpreton opozita.
“Kjo erdhi si rezultat i një projekti që është pjesë e nje programi që po e orientojmë drejt fshatit dhe ëpr të cilin fasada –fasada, palma-palma, pllaka-pllaka. E vërteta është që është punësim”.
Vlonjatëve u premtoi se vëmendja është përqëndruar më shumë në tre vitet në vazhdim ndonëse investimet për 4 vitet që ikën nuk ishin të vogla për qytetim bregdetar por plot 130 milionë dollarë.
