“Jam shumë i lumtur që sot nënshkruam memorandumin e mirëkuptimit për shkëmbimin e informacionit për rekordet kriminale me Ministrinë e Drejtësisë dhe Ministrinë e Brendshme. Shkëmbimi i informacionit është një pjesë shumë e rëndësishme në punën tonë, për luftën kundër krimit të organizuar. Ky memorandum është një demonstrim sesa pranë janë dy vendet tona tani, në përpjekjet e përbashkëta për luftuar këtë problem që na prek të gjithëve. Ky është një shembull shumë i mirë për hapat e mëtejshëm që do të ndërmarrim, për të qenë edhe më efektivë për të luftuar krimin e organizuar, këtu në Shqipëri dhe në Mbretërinë e Bashkuar”, deklaroi pas nënshkrimit të marrëveshjes, ambasadori britanik Duncan Norman.
Marrëveshja synon përmirësimin e drejtësisë penale, duke hetuar dhe parandaluar veprimtaritë antiligjore në territoret e të dyja vendeve përmes shkëmbimit të informacionit mbi të dhënat kriminale.
”Qeveria shqiptare dhe ajo e Britanisë së Madhe kanë nënshkruar sot një Memorandum Mirëkuptimi, që synon përmirësimin e drejtësisë penale, duke hetuar dhe parandaluar veprimtaritë antiligjore në territoret përkatëse, përmes shkëmbimit të informacionit mbi të dhënat kriminale”,-thuhet në reagimin e ministrisë.
Marrëveshja e nënshkruar në ambientet e Ministrisë së Drejtësisë, krijon kushtet ndërmjet palëve për shkëmbimin e informacionit të historikut kriminal, lidhur me një dënim apo gjurmët e gishtave, për shtetas të Mbretërisë së Bashkuar dhe shtetas shqiptar. Kjo do të ndihmojë në cilësinë e drejtësisë penale, duke rritur informacionet e shkëmbyera, administruar nga 2 vendet partnere. Informacion mes agjencive do të shkëmbehet edhe për shtetas nga vendet e treta, duke zvogëluar në këtë mënyrë kërcënimet e sigurisë së brendshme dhe sigurisë publike.
Shkëmbimi i historikut kriminal lidhur me një dënim, apo gjurmët e gishtave të shtetasve britanikë apo shqiptarë, pritet të ndihmojë në cilësinë e drejtësisë penale. Informacione do të shkëmbehen edhe për shtetas të vendeve të treta, për të ulur në këtë mënyrë kërcënimet e sigurisë së brendshme dhe asaj publike për palët respektive.
