Ministri i Jashtëm i Turqisë, Mevlüt Çavuşoğlu u takua me raportuesen speciale të OKB-së Agnes Callamard, e cila mbërriti në Turqi në kuadër të hetimit për vrasjen e gazetarit Jamal Khashoggi, raporton Anadolu Agency (AA).
Raportuesja speciale për ekzekutimet jashtëgjyqësore dhe ekspertët që përbëjnë delegacionin e saj duhet të takohet gjithashtu edhe me ministrin turk të Drejtësisë Abdulhamit Gül dhe kryeprokurorin e Stambollit Irfan Fidan.
Komisariati i Lartë i OKB-së për të Drejtat e Njeriut ka njoftuar më parë se Callamard do të qëndrojë në Turqi për hetimet ndërkombëtare për vrasjen e Khashoggit në Turqi nga 28 janari deri më 2 shkurt.
Callamard do të paraqesë informacionet dhe rekomandimet lidhur me hetimin në formën e një raporti në seancën e Këshillit të Kombeve të Bashkuara për të Drejtat e Njeriut.
Jamal Khashoggi, gazetar dhe kolumnist i “The Washington Post”, u vra më 2 tetor 2018 në Konsullatën Saudite në Stamboll.
Prokuroria turke konstatoi se ai u mbyt brutalisht pasi hyri në konsullatë dhe se trupi i tij u copëtua dhe u shkatërruar.
Autoritetet e Arabisë Saudite më vonë pranuan se Khashoggi u vra pa u larguar nga konsullata, siç pretendonte fillimisht.
Autoritetet në Arabinë Saudite kanë ngritur akuza kundër 11 të dyshuarve për vrasje ndërsa Prokuroria ka kërkuar dënime me vdekje për 5 të akuzuarit e parë.
Megjithëse u zbulua se kur, ku dhe si u vra Khashoggi, ende nuk dihet se ku janë mbetjet e tij.