Ministri i Punëve të Jashtme të Turqisë, Mevlut Çavusoglu bëri të ditur se punimet e Turqisë për sondazh në Mesdheun Lindor do të mund të fillojnë në vjeshtë.
Mevlut Çavusoglu dhe Kudret Ozersay, Zëvendëskryeministri dhe njëherësh ministri i Jashtëm i Republikës Turke të Qipros së Veriut (RTQV), i cili ndodhet për vizitë zyrtare në Ankara, pas takimit organizuan një konferencë të përbashkët për shtyp në rezidencën e Ministrisë së Jashtme.
Në përgjigje të një pyetjeje se kur do të fillojë Turqia me sondazhe për hidrokarbure në Mesdheun Lindor, ministri Çavusoglu tha: “Turqia në Mesdheun Lindor ka zonë ekonomike, ndërsa RTQV në këtë zonë ka platformë kontinentale dhe ujëra territoriale. Për ruajtjen e këtyre dy gjërave ne me kërkesë të RTQV çdoherë morëm dhe marrim masat e nevojshme”.
Shefi i diplomacisë turke rikujtoi se edhe më herët është penguar fillimi i sondazheve të Turqisë në këtë zonë, ndërsa vijoi me këto fjalë: “Tani edhe ne kemi marrë platformë dhe mund të fillojmë me sondazhe. Përgatitjet për këtë është duke i kryer mjaftë mirë Ministria e Energjetikës. Posaçërisht ministri i Thesarit dhe Financave, Berat Albayrak u angazhua mjaftë shumë për marrjen e kësaj platforme. Në vjeshtë mund të fillojnë punimet e sondazheve”.
Çavusoglu shtoi se Ankaraja e ka diskutuar këtë çështje me kompanitë e sondazheve, Bashkimin Evropian dhe me Greqinë që është vendi garantues, ndërsa bëri të ditur se sot në Izmir do të ketë një takim me homologun e tij grek, Nikos Kocias.
Ai theksoi se me ministrin Kocias, herë pas here në mënyrë jozyrtare bisedojnë në lidhje me çështje të ndryshme, përfshirë edhe atë të Qipros dhe shtoi se gjatë takimit të sotëm do të bisedojnë sërish për këtë.
Çavusoglu tërhoqi vëmendjen se pala greke e ishullit edhe nuk i qaset zgjidhjes edhe injoron të drejtat e palës turke dhe zhvillon aktivitete të njëanshme.
“Këto aktivitete nuk janë të dobishme për ata. Në qoftë se vazhdon në këtë mënyrë, atëherë edhe ne do të marrim dhe do të vazhdojmë të marrim çdo lloj mase. Ne do të fillojmë me sondazhe, natyrisht se do ti mbrojmë të drejtat dhe interesat ekonomike të popullit turk në Qipro, por edhe Republika e Turqisë ka të drejtat e saj në Mesdheun Lindor. Ne do të kërkojmë këtë të drejtë dhe do të bëjmë atë që është e nevojshme”, bëri të ditur Çavusoglu.
Ndërkaq Zëvendëskryeministri i RTQV, Ozersay në lidhje me sondazhe për hidrokarbure në Mesdheun Lindor gjithashtu përsëriti se edhe turqit qipriot kanë të drejtat e tyre mbi burimet natyrore sikurse grekoqipriotët, ndërsa shtoi se RTQV çdoherë ka qenë në kërkim të mirëkuptimit dhe bashkëpunimit në ishull.
“Nëse grekët qipriotë do të vazhdojnë aktivitetet e njëanshme të sondazheve, turqit qipriotë gjithashtu do të “fillojnë së shpejti me sondazhe në përputhje me licencën e lëshuar korporatës turke të naftës”, shtoi Ozersay.
Ai gjithashtu shtoi se RTQV çdoherë është në konsensus të plotë me Turqinë në çdo çështje dhe falënderoi ministrin Çavusoglu për këtë ftesë të bërë në një kohë dhe me përmbajtje mjaftë kritike./TRT
