Ministri i Jashtëm i Kolumbisë, Carlos Holmes Trujillo, deklaroi se nuk do të ndryshojnë vendimin për njohjen e Palestinës, marrë para përfundimit të mandatit të ish-presidentit Juan Manuel Santos.
“Vendi ynë nuk ka ndonjë qëllim për t’u tërhequr nga vendimi që ka marrë për njohjen e Palestinës. Nuk mendojmë të bëjmë hap prapa, por as edhe të përparojmë situatën. Çdo gjë do të vazhdojë siç është aktualisht”, u shpreh ministri Trujillo gjatë një konference për shtyp nga Shtetet e Bashkuara të Amerikës, ku po realizon një vizitë zyrtare, sipas ditores kolumbiane, “El Tiempo”.
Duke sqaruar se nuk do të ndërmerren hapa të reja në marrëdhëniet me Palestinën pavarësisht vendimit për njohjen e këtij shteti, shefi i diplomacisë kolumbiane theksoi se nuk do të hapin përfaqësi diplomatike në Palestinë, pasi ambasadat e vendit të tij në Egjipt dhe Izrael, siç tha ai, janë të mjaftueshme për të përmbushur kërkesat dhe procedurat zyrtare të qytetarëve të Kolumbisë.
Përmes dekretit të nënshkruar më datë 3 gusht nga ish-presidenti Santos, 4 ditë përpara se t’i përfundonte mandati, Kolumbia e njohu Palestinën si shtet të pavarur dhe sovran.
Nga ana tjetër, Izraeli e cilësoi këtë vendim si “surprizë dhe zhgënjim” me anë të një komunikate të shkruar nga ambasada e tij në Bogota. Kurse ambasadori izraelit në Kolumbi, Marco Sermoneta, realizoi një takim me ndihmëspresidenten kolumbiane, Marta Lucia Ramirez, të cilës i komunikoi shqetësimin e vendit të tij në lidhje me këtë vendim.
Sermoneta e quajti dekretin e Santosit si “një shuplakë ndaj një aleati besnik, e cila bie ndesh me afërsinë dhe cilësinë e marrëdhënieve ndërmjet vendeve dhe liderëve”.
Deri para vendimit të ish-presidentit Santos, Kolumbia, me një popullsi mbi 49 milionë banorë, ishte shteti i vetëm amerikanolatin që nuk e njihte shtetin palestinez, i cili e ka shpallur pavarësinë e tij më datë 15 nëntor 1988./TRT
