Avokati i Përgjithshëm në Gjykatën Evropiane të Drejtësisë, Campos Sanchez-Bordona, ka deklaruar se Mbretëria e Bashkuar mund të tërhiqet në mënyrë të njëanshme nga neni që thërret të largohet nga Bashkimit Evropian (BE) pa aprovimin e Unionit, transmeton Anadolu Agency (AA).
Bordona tha se sipas ligjit të BE-së një vend anëtar mund të revokojë nenin 50 pa pasur nevojë për miratim nga Komisioni Evropian ose 27 vendet e tjera anëtare.
“Avokati i Përgjithshëm propozon që Gjykata e Drejtësisë, në gjykimin e saj të ardhshëm, të deklarojë se neni 50 TEU (Traktati mbi BE-në) lejon revokimin e njëanshëm të shpalljes për synimin e tërheqjes nga BE”, tha Bordona në një deklaratë.
Sipas tij, revokimi i njëanshëm po ashtu do të ishte një manifestim i sovranitetit të shtetit anëtar që po largohet, i cili zgjedh të ndryshojë vendimin e tij fillestar.
Këshilla mund të nxisë fushatën anti-Brexit dhe deputetët që kanë argumentuar gjatë se revokimi i nenit 50 është më e thjeshtë se ajo që qeveria ka kërkuar.
Një grup ndërpartiak i parlamentarëve skocezë filloi një peticion ligjor në muajin dhjetor të vitit 2017, ndërsa muajin e kaluar gjykata e drejtësisë thirri një takim urgjent në Luksemburg për ta marrë në konsideratë atë.
Duke folur për Guardian, eurodeputeti skocez Alyn Smith, i përfshirë në procesin ligjor tha se “Tani kemi një udhërrëfyes për të dalë nga kaosi i quajtur Brexit dhe tashmë shihet një dritë në fund të tunelit, ndërsa zgjidhja që u është ofruar deputetëve nga kryeministrja May flet se kemi të bëjmë me një abuzim të Parlamentit”.
Qeveria ishte përpjekur të parandalonte rastin të arrinte në gjykatë.
