Kandidati presidencial në Brazil, Jair Bolsonaro doli nga spitali, ku ishte shtrirë për t’u trajtuar nga plagët e shkaktuara nga therrja me thikë, transmeton Anadolu Agency (AA).
Kandidati presidencial i krahut të djathtë ekstrem pati disa operime të abdomenit për shkak të lëndimit të zorrëve dhe gjakderdhjes së brendshme. Tentim atentati ndaj Bolsonaro u krye më 6 shtator gjatë një tubimi parazgjedhor në qytetin Juiz de Fora. Sulmuesin e kapën mbështetësit e tij dhe ia dorëzuan policisë.
Dalja e tij nga spitali në San Paolo është shtyrë për një ditë për shkak të infektimit. Spitali njoftoi se ai doli të shtunën në mëngjes.
Raundi i parë i zgjedhjeve presidenciale në Brazil, ku Bolsonaro është njëri nga favoritët, do të mbahet më 7 tetor. Mirëpo, nuk dihet nëse Bolsonaro do t’i kthehet fushatës parazgjedhore.
Organizatat për mbrojtjen e të drejtave të grave kanë paralajmëruar protesta kundër Bolsonaros. Nga ana tjetër edhe mbështetësit e tij kanë paralajmëruar disa tubime këtë fundjavë.
