Botërori i Suprizave, Senegali mposht Poloninë e Lewa & Co

Polonia ka dështuar në përballjen e parë në Botëror ndaj Senegalit, ku skuadra nga Afrika e ka mposhtur me lojë, por edhe me rezultat skuadrën e udhëhequr nga Robert Lewandowski.

Senegali ka arritur një fitore historike në ndeshjen e parë të Kupës së Botës duke mposhtur Poloninë me rezultatin 2-1. Ishte një ndeshje me ritëm të lartë nga të dyja skuadrat për dy gabime trashanike kanë vendosur fatin e sfidës.

Secila nga të dyja kombëtaret, kishte në përbërje një yll, tek afrikanët ishte sulmuesi i Liverpool-it, Sadio Mane, kurse tek evropianët, ai i Bayern Munchen, Robert Lewandowski.

Ky sukses në “Otkrytie Arena” të Moskës, bëri të lumtur jo vetëm senegalezët, por edhe gjithë afrikanët, pasi ishte fitorja e parë e një kombëtareje afrikane nw Rusi 2018.

Polonia e nisi mirë ndeshjen, duke luftuar me afrikanët e fortë fizikisht por nuk arrin të krijojë mundësi goli pasi Lewandowski është bllokuar më së miri nga mbrojtësit senegalezë. Pak përpara se të përfundonte pjesa e parë ishte autogoli i Cionek ai që zhbllokoi rezultatin për Senegalin që e meritonte golin për volumin e lartë të lojës të krijuar.

Me të filluar pjesa e dytë, Robert Lewandowski rrezikoi nga gjuajtja e lirë, por portieri Khadim N’Diaye e dërgon topin në rivënie nga këndi.

Senegali iu kundërpërgjigj me gol në minutën e 60-të. M’Baye Niang në një kundërsulm të shpejtë, kalon edhe Wojciech Szczesny që e kishte liruar portën dhe shënoi në portën e zbrazët.

Polonia tentoi të rikthehet në lojë me Arkadiusz Milik dhe Robert Lewandowskin, por pa sukses.

U desh të vije minuta e 85-të që polakët ta gjejnë golin. Grzegorz Krychowiak shënon me kokë pas një harkimi të bukur në zonë. Deri në fund nuk kishte më gola dhe senegalezët iu gëzuan tri pikëve.

Të Ngjashme