Berisha i përgjigjet pozitivisht ftesës së Bardhit: Do jemi në tryezën e nesërme

Ish-kryeministri Sali Berisha i është përgjigjur pozitivisht ftesës së Gazmend Bardhit për të mbajtur një tryezë të përbashkët mes depuetëtve të Partisë Demokratike, për të harmonizuar aksionin opozitar kundër qeverisë.

Në përfundim të seancës së kësaj të enjteje, Berisha theksoi se do të jetë prezentë në tryezën e përbashkët të deputetëve demokratë që do të mbahet ditën e martë.

Por për sa i përket një bashkimi të mundshëm me grupin e Gazmend Bardhit, Berisha nuk dha një përgjigje të prerë, por tha se informacionet do të jepen në kohën e duhur.

Fjala e Berishës jashtë parlamentit:

Theksova edhe në parlament, theksoj përsëri se ky parlament është i ngritur mbi krimin, drogën, është parlamenti i vetëm në Europë në të cilin vjedhja, krimi, droga shndërrohen në votë dhe vota shndërrohet në krim.

Është institucion i fatkeqësisë kombëtare, është institucion që të vetmin vendim që ka marrë, ka dyfishuar rrogat e tij, është institucion i cili ka kaluar me dhjetëra vendime të lotuara nga krimi dhe grupet kriminale, është institucion i cili ka bllokuar të gjitha nismat me rëndësi kombëtare. Nuk ka lejuar rezolutën për dënimin e gjenocidit serb në Kosovë dhe trojet shqiptare.

Është institucion i cili me qëndrimet e tij, jo që nuk i shërben integrimit, por i shërben dezintegrimit të Shqipërisë në BE dhe e lë në vend numëro. Është institucion i cili siç e dëgjuat përpiqet të përligjë gjithçka antikushtetuese, antiligjore të qeverisë dhe të mbulojë krimet e saj.

Pyetje: Do të merrni pjesë në tryezë nesër?

Sali Berisha: Po do të marrim pjesë. Ne shkojmë aty dhe do të marrim pjesë. Edhe ftesën e konsiderojmë hap pozitiv dhe ne do të marrim pjesë.

Pyetje: Për negociata apo bashkim?

Sali Berisha: Do t’i mësoni që të gjitha në kohën e duhur, por ne i përgjigjemi pozitivisht ftesës.