Belgjika e nisi me këmbën e duhur eksperiencën në kampionatin botëror, teksa mposhti në debutim Panamanë, me rezultatin e thellë 3-0. Vendi nga Amerika Qendrore, që luante për herë të parë në finalet e një kampionati botëror, rezistoi vetëm në 45 minutat e para, të cilat u mbyllën me rezultatin 0-0.
Mundësitë për të shënuar nuk munguan, por Mertens me shokë nuk ishin të qetë dhe mbase e kishin nënvlerësuar më shumë sesa duhej sfidën ndaj një ekipi inferior.
Por pas pushimit belgët u futën me një mentalitet tjetër, ishin më agresivë dhe më kreativë, dhe kjo u pa te goli i parë.
Pas një aksioni të bukur, topi shkon te Dries Mertens i cili me një goditje fantastike me të parën ka arritur të zhbllokojë rezultatin. Pas tij ishin dy golat e Romelu Lukaku-t që vulosën tre pikët e para për Djajtë e Kuq.
Gjithsesi, përtej fitores, Belgjika shfaqi probleme në fushën e lojës, veçanërisht në bashkëpunimin mes lojtarëve, që nuk ishte në nivelin e duhur për një skuadër pretendente.
