“Shqipëria ofron një model harmonie fetare për të shëruar radikalizmin fetar, një nga sëmundjet më të rrezikshme të kontinentit Europian dhe BE-së, në këto kohë sfidash integrimi dhe bashkëjetese”.
Kështu e ka nisur fjalën e tij deputeti socialist, Ervin Bushati, mbajtur në Komitetin e Politikës dhe Demokracisë në Këshillin e Europës, në Paris.
Për Bushatin, modeli i bashkëjetesës fetare në Shqipëri është antidoti për sëmundjen europiane, ku radikalizmi fetar dukshëm mbetet një nga problemet më të mëdha të Europës.
“Shqipëria është krenare të ofrojë në Europë harmoninë e marrëdhënieve ndërfetare, si një kapital i vlerave më të mira njerëzore në shoqërinë tonë. Marrëdhëniet mes feve të ndryshme nuk janë thjesht bashkëjetesë, por një model që vlen edhe më shumë sot, në realitetin e ri dhe sfidat që po përballet Bashkimi Europian në integrimin e qytetarëve me besime të ndryshme fetare”, – tha Bushati.
Për Bushatin, harmonia fetare në mjaft raste vihet në rrezik, nëse ajo financohet politikisht, duke sjellë kështu si pasojë terrorizmin fetar, i cili vitet e fundit është një nga sëmundjet më të mëdha europiane. /ATSH
