Kryebashkiaku Erion Veliaj në një komunikim për mediat foli për aksidentin në Tiranë pranë Kinema Agimi, ku mbetën të lënduar pesë persona.
Veliaj tha se nga ekspertiza e policisë, rezultoi se të dy drejtuesit e automjeteve nuk kishin konsumuar alkool.
“Sot kemi pasur një aksident midis një autobusi dhe një makine. Lajmi i mirë është që kemi të lënduar lehtë. Menjëherë do të shkojmë në spital për të parë se si janë. Të dy drejtuesit e mjetit nuk kanë konsumuar alkool. Sigurisht në një zonë me shumë trafik dhe shumë aktivitete në Tiranë, lajmi i mirë është që nuk kemi të lënduar rëndë. Duhet të lejojmë policisë të bëjë punën dhe të mos bëhemi ekspertë për gjithçka”, tha Veliaj.
Ndërsa drejtuesi i policisë rrugore Taulant Gjoka tha: “Si e shikoni është një aksident rrugor që në pamje të parë duket i rrezikshëm. Kemi persona të dëmtuar lehtë. Më e rëndësishme është reagimi i parë që ka qenë në kohë reale”.
Aksidenti u raportua këtë të premte, rreth orës 20:10, në afërsi të Kinema Agimi. Një autobus u përplas me një automjet dhe si pasojë e aksidentit të dy përfunduan në Lumin Lana, ndërsa automjeti përfundoi poshtë urbanit.
Të lënduarit u transportuan në Spitalin e Traumës për kujdes shëndetësor dhe ndodhen jashtë rrezikut për jetën.
