Belgjika shkatërroi 5-2 Tunizinë në ndeshjen e dytë në grup duke arritur kualifkimin e merituar e duke dërguar në shtëpi skuadrën afrikane. Dy gola nga Eden Hazard dhe dy të tjerë nga Romelu Lukaku i shërbyen “Djajve të Kuq” të merrnin fitoren, ndërsa tunizianët mundën të realizonin vetëm një gol shpresë në pjesën e parë, por nuk arritën asnjëherë që të rivalizonin për të marrë qoftë edhe një pikë.
Pjesa e parë nisi me vrull dhe 3 gola në 17 minuta. Belgët kaluan të parët në avantazh në minutën e 6 kur Eden Hazard realizoi nga pika e badhë pas një 11-metërshi të fituar nga vetë ai kur u pengua në hyrje të zonës tuniziane. Dhjetë minuta më vonë ishte Romelu Lukaku që dyfishoi epërsinë e skuadrës së tij, kur mori një pasim të shkëlqyer nga Mertens dhe me të majtën e tij mposhti portierin tunizian Ben Moustafa, duke mos i lënë asnjë mundësi reagimi.
Por dy minuta më pas Tunizia ngushton diferencën me golin e mbrojtësit Bronn. Por përpara se lojtarët të drejtoheshin drejt dhomave të zhveshjes për të bërë 15 minuta pushim, ishte Lukaku ai që shënoi dopietën e tij pas pasimit të Munier. Lukaku është bërë lojtari i parë që pas Diego Maradona-s më 1986 që shënon më shumë se një gol në dy ndeshje radhazi.
Pas pushimit kishte vetëm një ekip në fushë dhe ai ishte Belgjika. Hazard shënon dopietën e tij në minutën e 51’ falë një pasimi marramendës të De Bruyne, me Hazard që driblon portierin dhe shënon me portën e boshatisur.
