Turqia do të marrë masa të reja pas provokimit që i bëri Greqia anijes turke “Barbaros Hayrettin Pasha”, e cila vazhdon aktivitetin e kërkimeve sizmike në platformën kontinentale turke në Mesdheun Lindor.
Ministri i Energjetikës dhe Burimeve Natyrore të Turqisë, Fatih Dënmez (Dönmez) situatën e vlerësoi në Izmir bashkë me Ministrin e Energjisë së Republikës Turke të Qipros së Veriut (RTQV), Ëzdil Nami (Özdil Nami).
Ministri Dënmez tha se anija e kërkimeve sizmike “Barbaros Hayrettin Pasha” do të vazhdojë misionin që ka në rajon, ndërsa shtoi se në lidhje me këtë do të merren edhe masat e nevojshme ushtarake.
Anija kërkimore e Korporatës së Hidrokarbureve të Turqisë (TPAO) e vazhdon aktivitetin e saj sipas licencës që i është dhënë nga Ministria (e Energjetikës dhe Burimeve Natyrore), dhe këtë të drejtë anija do ta përdorë deri në fund, theksoi ministri Dënmez.
“Veprimet e njëanshme të ndërmarra nga pjesa grekoqipriote për ne nuk kanë asnjë anë të pranueshme. E kemi deklaruar edhe më herët që për ne janë të papranueshëm hapa të tillë, të cilët hidhen në mënyrë të njëanshme pa pasur një ndarje të drejtë (të pasurive), pa u ulur të dyja palët në tryezë, pa u arritur një marrëveshje mbi ndarjen e burimeve natyrore (të ishullit). Po e përsëris edhe një herë hapur sot, që anija jonë “Barbaros Hayrettin Pasha” do të vazhdojë të kryejë detyrat e saj atje”, deklaroi ministri Dënmez.
Edhe Komanda e Forcave Detare vazhdon të punojë mbi rrugët e reja të angazhimit dhe së shpejti,- vijoi ministri Dënmez,- Komanda do të publikojë edhe detajet në lidhje me këtë./TRT
