Integrimi i grave në vendimmarrje përbën një hap të madh për një shoqëri demokratike, thotë deputetja e parlamentit shqiptar, Eglantina Gjermeni, shkruan faqja e njohur 50-50magazine.fr.
Në një intervistë për këtë faqe të specializuar për çështjet e barazisë gjinore, Gjermeni shton se ”gjatë 28 viteve të fundit, Shqipëria ka pësuar transformime të mëdha. Tranzicioni nga një shoqëri e mbyllur dhe e izoluar në një shoqëri të hapur dhe të lirë ka çuar në ndryshime të mëdha në shoqërinë shqiptare. Gjatë këtyre viteve, gratë u përballën me sfida të shumta që përfshinin arritje dhe hapa pas”.
”Që nga viti 2008, kuota gjinore u bë pjesë e sistemit legjislativ shqiptar. Numri i grave të përfshira në vendimmarrje, si në nivel kombëtar dhe atë lokal, është rritur në mënyrë të konsiderueshme. Hapësirat politike janë hapur dhe vendimmarrja është bërë më gjithëpërfshirëse. Ne mund të themi me krenari se gjysma e anëtarëve të qeverisë aktuale shqiptare dhe e qeverisë së mëparshme janë dhe ishin gra”, thekson ajo.
”Barazia mes grave dhe burrave është e përcaktuar në nenin 18 të Kushtetutës shqiptare të miratuar në vitin 1998. Shteti shqiptar ka miratuar ligje në drejtim të barazisë gjinore. Ligji nr. 9970 ‘Për barazinë gjinore në shoqëri’, i cili hyri në fuqi në vitin 2008, vendos barazinë mes grave dhe burrave në të gjitha sferat e jetës private dhe publike”, shton Gjermeni.
”Parlamenti shqiptar ka një mekanizëm tjetër që mund të ndihmojë në avancimin e situatës së grave në Shqipëri. ‘Aleanca e Grave’ është një grup jozyrtar i grave parlamentare, të të gjitha partive, i krijuar në vitin 2013. Puna e përbashkët e këtyre dy grupeve mund të nxisë nismat ligjore për këtë çështje. Kjo mund të çojë në forcimin e rolit të grave në procesin e vendimmarrjes. Ky bashkëpunim mund të rrisë monitorimin e zbatimit të politikave për kuotat gjinore dhe shoqërinë”, nënvizon deputetja e parlamentit shqiptar.
”Para viteve 90, gratë shqiptare nuk u kursyen, bënin punë të rënda njëlloj si burrat dhe slogani ‘gruaja është e fortë’ ishte diçka e zakonshme gjatë periudhës komuniste. Gratë ishin të pranishme në ndërtim, veprimtari kolektive, vreshta, etj. Gratë punonin shumë jashtë shtëpisë, duke mbajtur përgjegjësinë për punët e shtëpisë. Pasi propaganda socialiste i shpalli ato të barabarta me burrat, ato nuk mund të ankoheshin për ngarkesën e punës tepër të lodhshme.
Në fillim të viteve 1990, kur filluan ndryshimet, gratë ishin të parat që humbën vendin e punës. Më pas, kishte më shumë gra të papuna sesa burra. Atëherë në Shqipëri u shfaq papunësia tek gratë. Vendi ndërmori disa programe për të mbështetur futjen e grave në punë. Megjithatë, vërehet akoma një pjesëmarrje e ulët e grave në sektorin e biznesit. Dallimet mes pagave mbeten gjithashtu gjithmonë domethënëse.
Situata po ndryshon pak nga pak. Gratë po punojnë gjithnjë e më shumë në një shumëllojshmëri profesionesh. Megjithëse gratë janë ende shumë aktive në të ashtuquajturat profesione të grave, pjesëmarrja e tyre në profesione që tradicionalisht nuk konsiderohen si femërore është në rritje. Ato janë gjithashtu më të pranishme në administratën publike.
Për të nxitur ndryshimin, gratë shqiptare duhet të jenë ekonomikisht dhe politikisht të pavarura. Ne kemi nevojë për më shumë politika publike për të siguruar punë për gratë. Nevojitet gjithashtu një mbështetje më e madhe për nënat që punojnë dhe politika sociale për familjet.
Integrimi i më shumë grave në procesin e vendimmarrjes është një hap i rëndësishëm për të siguruar një shoqëri më demokratike, më gjithëpërfshirëse dhe një zhvillim ekonomik dhe social më të qëndrueshëm të vendit”, përfundon Gjermeni për 50-50magazine.fr, raporton ATSH.
